Հայաստան ներկրված կուսաթաղանթները չեն օգնի անկեղծ սիրային հարաբերություններ կառուցել

Երեկվանից սոցցանցերում չեն դադարում խոսակցությունները Հայաստան ներմուծված արհեստական կուսաթաղանթների վերաբերյալ: Թեմայի շուրջ ծավալվում են թեժ քննարկումներ, որոնք երբեմն հասնում են վեճի՝ հայ ազգի բարոյական նկարագրին այդ երևույթի հարիր լինելու կամ չլինելու մասին:

Պատճառն այն է, որ shamshyan.com կայքում տեղադրվեց մի նյութ, որտեղ դրա հեղինակը պնդում էր, թե «մոտ 10 օր առաջ ֆիզիկական անձը Հայաստան է ներմուծել մեծ քանակությամբ կուսաթաղանթ, և որ իբր «կուսաթաղանթները կշռում են 3-5 գրամ, իսկ ընդհանուր քանակը մոտ կես տոննա է եղել»: Արդեն երեկ երեկոյան մասնավորապես Facebook սոցցանցում, որոշ օգտատերեր կարծիքներ էին հայտնում՝ հղում կատարելով հայաստանյան կայքերից մեկին, որտեղ իսկապես տեղադրված էր արհեստական կուսաթաղանթների ազատ վաճառքի մասին տեղեկություն:

Այս առնչությամբ «Առաջին լրատվական»-ը զրուցեց բժիշկ-սեքսոպաթոլոգ Վրեժ Շահրամանյանի հետ՝ մասնագիտական կարծիք ստանալու և հասկանալու համար՝ ինչո՞ւ է այս թեման այսքան մեծ աղմուկ բարձրացրել, ու արդյո՞ք արհեստական կուսաթաղանթն այն ամենամեծ խնդիրն է, որ այսօր ծառացել է մեր ազգի առաջ:

Վրեժ Շահրամանյանի խոսքերով՝ այս թեման, ցավոք, դարձել է վերջին օրերի ամենաքննարկվողներից մեկը, ինչը, իհարկե, անլուրջ է: Բազում առավել կարևոր հարցեր կան, քան զուտ բիզնեսային շահեր հետապնդող արհեստական կուսաթաղանթը:

Բացի այդ, ինչպես տեղեկացրեց բժիշկ-սեքսոպաթոլոգը, «թեման ժամանակավրեպ է», քանի որ անցյալ տարվա դեկտեմբերին էլեկտրոնային լրատվամիջոցներից մեկում ինքն արդեն անդրադարձել է այս հարցին՝ տալով մասնագիտական գնահատական և վերլուծություն:

«Երևույթը նոր չէ, պարզապես որոշ լրատվամիջոցներ վերընթաց ու «շիկացած» ռեյտինգային սանդղակ ապահովելու և ինտրիգային նյութեր պատրաստելու նպատակով խիստ ուշացումով հևիհև ու անտեղի քննարկում են այն, ինչը վաղուց արդեն արվել է»,- ասաց նա՝ հավելելով, որ նման անզգույշ և անուշադիր աշխատանքի արդյունքում մի ամբողջ հանրություն հայտվում է լարվածության և ապատեղեկատվության մթնոլորտում:

Նրա համոզմամբ՝ նման թեմաների համառ և տևական քննարկումն անցանկալի է և վտանգավոր, քանի որ հաճախ արդյունքում մասնագիտական և սիրողական կարծիքները միախառնվում են՝ ստեղծելով քաոսային տհաճ իրավիճակ:

«Վերջիվերջո, ցանկացած տեսակի հարաբերությունների ամրության գրավականը անկեղծությունն է, որն արհեստական «թաղանթներով» չի կառուցվում»,- նշեց Վրեժ Շահրամանյանը:

Հարցեր, պատասխաններ, մեկնաբանություններ