Ինչ ստացվեց, երբ որոշեցինք «արհեստական կուսաթաղանթ» գնել

Հայաստան կուսաթաղանթ ներկրելու մասին լուրը մի քանի րոպեների ընթացքում ցնցեց համացանցը. շատերը չեն հավատում, որ նման բան կարող է գոյություն ունենալ, նույնիսկ մարդու առողջության պահպանման համար պատասխանատու մասնագետները այդ առարկայի գոյության մասին չգիտեն:

Այսպես, Կառավարությանն առընթեր Հարկային եկամուտների պետական կոմիտեի լրատվական ծառայությունից փորձեցինք ճշտել` հնարավո՞ր է, որ Հայաստան «արհեստական կուսաթաղանթ» է ներկրվել, սակայն այստեղ զարմացան, որ նման բան գոյություն ունի և խոստացան ճշտելու դեպքում տեղեկացնել:

Առողջապահության նախարարության մոր և մանկան առողջության պահպանման բաժնի պետ Գայանե Ավագյանը նույնպես տեղյակ չէր, որ նման իր կարող է լինել: «Ինչ վերաբերում է ձեր հարցին, թե ինչպես կարող է ազդել առողջության վրա, կարծում եմ, որ առանձին վտանգ չի ներկայացնում, բայց մյուս կողմից դա կարող է խաբեության ձև լինել»,- Panorama.am-ի թղթակցի հետ զրույցում ասաց Գայանե Ավագյանն ու խնդրեց իրեն ժամանակ տրամադրել, որպեսզի ինքը այդ թեմայի շրջանակներում պատրաստվի և նոր միայն կարողանա պատասխանել մեր հարցերին:

Մինչ պատկան մարմինները կճշտեն` նման ապրանք իսկապե՞ս ներմուծվում է Հայաստան և մասնագետներն էլ կփորձեն ուսումնասիրել հարցը, Panorama.am-ի թղթակիցը փորձեց զուտ հետաքրքրության համար գնալ ինտերնետում «արհեստական կուսաթաղանթի» վաճառքի մասին հայտարարությունների հետքերով:

Նախ այդ ապրանքի մասին հայտարարություն տվողի հետ շփվել ենք բացառապես էլեկտրոնային նամակագրությամբ և աղջիկը, որը տեղադրել էր այն, գրել էր, որ «…կնոջ կուսությունը խիստ կապված է ընտանիքի անվան ու պատվի հետ, սակայն երբ որոշ կանայք կորցնում են իրենց կուսությունը մինչև ամուսնությունը, լուրջ խնդիրներ են առաջանում, անգամ վեճերի ու հոգեբանական սթրեսների առաջ կանգնում»: Եվ այս ամենից առանց խնդիրների դուրս գալու համար, մեզ հետ կապ հաստատած աղջիկն ասում էր, որ աշխարհում լավագույն գինեկոլոգները խորհուրդ են տալիս օգտագործել «արհեստական կուսաթաղանթ»:

Նա բացատրում էր, որ «արտադրանքը» ունի օգտագործման պարզ ձև և «աշխատում է» 100%-ով: Այն կլինիկապես ապացուցված է որպես ոչ թունավոր մարդու օրգանիզմի համար և չի առաջացնում կողմնակի բարդություններ, անցավ է օգտագործելիս և ալերգիկ ռեակցիաներ չի առաջացնում: 

«Կնոջ հեշտոցում տեղադրվելուց հետո, այն մի փոքր ընդարձակվում է և կնոջը պարգևում ձգող զգացողություն: «Թաղանթը» 20-25 րոպե հետո ամբողջությամբ կարող է լուծվել հեշտոցում, այդ իսկ պատճառով խուսափեք հարաբերությունը երկար ձգձգելուց նաև, քանի որ այն ունի հատուկ բաղադրություն, և հեղուկից կամ թաց մակերևույթից անմիջապես հալվում է: Տղամարդու սերմնահեղուկի հետ խառնվելով այն ստանում է կուսաթաղանթին բնորոշ բաց կարմիր (գրեթե վարդագույն) արյան գույն և արտահոսում հեշտոցից հարաբերության ավարտից ու առնանդամի դուրս գալուց անմիջապես հետո: Ցանկության դեպքում կարող եմ ուղարկել այն ձեր ուզած հասցեով, ծրարի մեջ, կամ գաղտնիության համար կարող ենք հանդիպել և փոխանակվել», -փոխանցել էր աղջիկը, որի հետ կապվել էինք «արհեստական կուսաթաղանթը» գնելու նպատակով:

Հարցեր, պատասխաններ, մեկնաբանություններ