Ինչպիսի հարցերով են դիմում մեր քաղաքացիները սեքսապաթալոգներին, ինչից են բողոքում նրանք

Mardik.am-ը զրուցեց սեքսապաթալոգ Մարատ Զաքարյանի հետ: Պրն Զաքարյանի խոսքով՝ սեռական առողջությունը  մարդու  ընդհանուր առողջության մի մասն է, հետևաբար մարդու մոտ պետք է կարգավորված լինի նաև սեռական առողջությունը: «Թե տղամարդու, թե կնոջ սեռական կյանքում, եթե կա որևէ ինտիմ խնդիր, ապա դա պետք է բուժվի և կարգավորվի»,- ասաց պրն Զաքարյանը:

Սեքսապաթալոգի խոսքով՝ սեքսապաթալոգներին դիմողների թիվն ավելացել է հատկապես կանանց շրջանում, իսկ ավելի կոնկրետ` երիտասարդ 18-22 տարեկան աղջիկների շրջանում (խոսքս նաև տղամարդկանց մասին է): «Դա բացատրվում է  նրանով, որ երիտասարդներն  ինտերնետից ավելի շատ են տեղեկանում սեռական խնդիրների մասին»,- պարզաբանեց մասնագետը:

Մարատ Զաքարյանից նաև հետաքրքրվեցինք՝ ավելի շատ ինչ հարցերով են դիմում սեքսապաթալոգներին: Ի պատասխան՝ զրուցակիցս նախ ասաց, որ  միջին և հասուն տարիքի տղամարդիկ  հիմնականում դիմում են սեռական ցանկության հարցերով, իսկ երիտասարդներին հուզում են վաղաժամ սերմնաժայթքումը և էրեկցիայի թուլությունը:

Ինչ վերաբերում է կանանց, ապա նրանք ավելի շատ դիմում են սեռական ցանկության, օրգազմի, սեռական ցանկության իջեցման հարցերով:

Հետաքրքիր է՝ ինչպիսի վիճակ է մարզերում  այս առումով: Մարատ Զաքարյանի խոսքով՝ մարզերից կանայք ավելի շատ են դիմում սեքսապաթալոգներին, քան երևանաբնակ կանայք:

Սեռական ճանապարհով փոխանցվող ինֆեկցիաների տարածվածության մասին էլ խոսելիս զրուցակիցս ասաց, որ հիվանդությունների տարածման միտում է նկատվում, ավելին՝ անգամ երիտասարդացում է նկատվում: Բացատրությունը հետևյալն է՝ շփումներն արտասահմանի հետ ավելացել են, ինտերնետով ծանոթություններն են ավելացել՝ առանց իրար ճանաչելու ինտիմ հարաբերություններ են ունենում, ավելին՝ հաճախ է պատահում, որ երիտասարդ աղջիկը կամ տղան փոխում են իր զուգընկերուհուն կամ զուգընկերոջը:

Արդյոք երիտասարդները  բավարար չափով  գիտելիքներ ունեն սեռական կյանքի և սեռական  առողջության  մասին, պրն Զաքարյանի խոսքով՝  մեր երիտասարդները քիչ  և աղավաղված տեղեկատվություն ունեն սեռական առողջության մասին: «Դրա պատճառն այն է, որ գրքերում և ինտերնետում կա և՛ լավը, և՛ վատը: Մեր երիտասարդները  պետք է հետևեն սեքսապաթալոգների ելույթներին և նորմալ գրականություն կարդան»,- եզրափակեց Մարատ Զաքարյանը:

Հարցեր, պատասխաններ, մեկնաբանություններ