Օրգազմի ցավազրկող ազդեցությունը հավասար է 10 մգ մորֆինի ազդեցությանը. սեքսապաթոլոգ

«Տղամարդիկ հակված են կենտրոնանալու սեռական ֆունկցիայի վրա, գնահատում են սեռական կյանքի ֆիզիկական կողմը, իսկ կանայք ավելի հաճախ միտված են դեպի հարաբերություններն ու շփումը, գերագնահատում են սեռական կյանքի զգացմունքային կողմը»,- «Առաջին լրատվական»-ի հետ զրույցում ասաց ԵՊԲՀ սեքսապաթոլոգիայի ամբիոնի վարիչ, սեքսապաթոլոգիայի կլինիկայի ղեկավար, դոցենտ Սևադա Հակոբյանը։

Մասնագետը ներկայացրեց սեքսոլոգիայի վերջին ուսումնասիրությունները, որոնք ապացուցում են, որ կանանց և տղամարդկանց շրջանում օրգազմն ունի դրական, հրաշագործ ազդեցություն: Այն ունի հակացավային, հակասթրեսային ազդեցություն, որը կապված է օքսիտոցինի ձերբազատման հետ: Տվյալ հորմոնը մեծ քանակով արտազատվում է օրգազմի ժամանակ, որն ապացուցվում է նաև գլխուղեղի մագնիսառեզոնանսային տոմոգրաֆիկ հետազոտության ժամանակ. «Տղամարդու օրգազմի ժամանակ այնպիսի նյութեր են արտազատվում և դուրս բերվում շագանակագեղձից, որոնք իջեցնում են քաղցկեղի հավանականությունը։ Այն մարդիկ, որոնք ունենում են ռեգուլյար օրգազմ, ավելի քիչ են հակված ինքնասպանության և դեպրեսիայի։ Եթե անձը բավարարված է սեռական կյանքում, դա նշանակում է, որ հետագայում ևս նա առավել քիչ է հակված դեպրեսիայի»։

Սևադա Հակոբյանն ընդգծեց, որ սեռական կյանքի բավարարվածության և կյանքի որակի միջև կա փոխկապակցվածություն, որն ապացուցված է գիտականորեն։ Ըստ այդ ուսումնասիրության՝ 91 տոոկոս տղամարդիկ և 84 տոկոս կանայք կարևորում են սեռական կյանքի ազդեցությունն իրենց ինքնազգացողության վրա, և ովքեր ավելի հաճախ են ապրում սեռական կյանքով, ավելի քիչ կարիք ունեն հոգեմետ դեղերի. օրգազմի ժամանակ ցավազրկող մեդիատորը VIP-ն է, որը գլխացավի ժամանակ մեծ ազդեցություն է ունենում։ Օրգազմը ցավազրկող ազդեցություն է ունենում նաև միգրենոզ գլխացավերի ժամանակ, որի ազդեցության ուժը հավասար է 10 մգ մորֆինի ազդեցությանը»։

Կան նաև այլ հետաքրքիր տվյալներ. կանանց կողմից կծու տաքդեղի օգտագործումը բերում է հեշտոցի առաջային պատին գտնվող G կետի (գոտու) վնասմանը և ցավազրկող զգացողությունն ավելի թուլանում է։ G կետը գտնվում է հեշտոցի առաջնային պատին, որն իրենից ներկայացնում է նյարդային վերջույթների (ռեցեպտորների) կուտակում։ Այն մեծ նշանակություն ունի կնոջ օրգազմի մեխանիզմում։ Այս գոտու գրգռումը ծննդաբերության ժամանակ պտղի իջնելու միջոցով ապահովում է ցավազրկող էֆեկտ, այդ պատճառով էլ հին հնդկուհիները հղիությունից առաջ կծու չէին օգտագործում։

Հարցեր, պատասխաններ, մեկնաբանություններ