Շոտլանդացիները կանանց հարբեցողության դեմ պայքարի բջջային նոր ծրագիր են թողարկել

Շոտլանդիայի առողջապահության նախարարությունը ներկայացրել է «հայելի հարբեցողների համար» բջջային ծրագիրը, որի նպատակն է հակազդել կանանց հարբեցողությանը:

Ծրագիրն օգտատերերին առաջարկում է սմարթֆոնում տեղադրված ֆոտոխցիկով նկարվել, այնուհետև նշել, թե շաբաթվա ընթացքում քանի բաժակ ալկոհոլային խմիչք են օգտագործում: «Բաժակ» ասելով՝ ծրագիրը նկատի ունի 175 միլիլիտր ալկոհոլի չափաբաժին:

Դրանից հետո ծրագիրը ցույց է տալիս, թե ինչպիսի տեսք կունենա օգտատերը 10 տարի անց, եթե շարունակի այդ չափաբաժնով ալկոհոլ օգտագործել:

Նախարարության տեղեկատվության մեջ նշվում է, որ Շոտլանդիայում 30-44 տարեկան կանանց շրջանում վերջին 20 տարվա ընթացքում ալկոհոլի չարաշահման հետևանքով մահացության թիվը մեծացել է կրկնակի, իսկ լյարդի ցերոզից մահացության դեպքերը` եռակի:

Վերոհիշյալ բջջային ծրագիրը կարելի է ներբեռնել հեռախոսի մեջ Google Play խանութում: Մինչև 2013 թ. մարտ ծրագիրը կներբեռնվի անվճար:

Հարցեր, պատասխաններ, մեկնաբանություններ