Քաղցկեղով հիվանդներն ինչո՞ւ պետք է շոկոլադ չուտեն. news.am

Քաղցկեղային հիվանդությունների դեմ բուժվող հիվանդներին խորհուրդ է տրվում խուսափել շոկոլադի օգտագործումից, քանի որ պարունակում է բաղադրամասեր, որոնք նպաստում են օրգանիզմում ուռուցքի տարածմանը եւ մետաստազների առաջացմանը: Այս մասին է վկայում Institute for Research-ի (Բարսելոն) գիտնականների իրականացրած հետազոտությունը:

Շոկոլադի (նաեւ բիսկվիտի, հացի եւ այլ մթերքների) բաղադրության մեջ մտնող արմավի յուղը խթանում է CD36 կոչվող սպիտակուցի գործունեությունը: Փորձագետների ենթադրությամբ՝ այս սպիտակուցը ոչ միայն ուռուցքի առաջացման հարցում առանցքային դեր ունի, այլ նաեւ օրգանիզմում դրա տարածման` մետաստազների առաջացման գործընթացում:

Գիտնականները CD36 սպիտակուցը հայտնաբերել են բերանի, մաշկի, ձվարանների, միզապարկի, թոքերի, կրծքագեղձի ուռուցքներով հիվանդների քաղցկեղային բջիջների մեմբրաններում:

Այս ենթադրությունը հաստատելու համար լաբորատոր մկներին, որոնք տառապել են մարդուն հատուկ բերանի խոռոչի քաղցկեղով, տվել են արմավի յուղի փոքր եւ մեծ քանակ պարունակող սննդամթերք: Բոլոր կենդանիների մոտ արմավի յուղի սպիտակուցի ազդեցությանը ենթարկված ուռուցքները տարածվել են, նշված է Nature ամսագրում հրապարակված հետազոտության մեջ: Արմավի յուղ չստացած մկների միայն կեսի մոտ է ուռուցքն օրգանիզմում տարածվել: Դա վկայում է, որ ցանկալի է օնկոհիվանդներն իրենց սննդակարգից բացառեն այն մթերքները, որոնք արմավի յուղ են պարունակում, ինչը կօգնի կրճատել ուռուցքի տարածումը:

Հարցեր, պատասխաններ, մեկնաբանություններ