Գիտնականներն ապացուցել են աղի փոքր քանակությամբ սննդակարգի անօգտակարությունը. 1in.am

Նվազագույն քանակով աղի օգտագործումն առողջությանը որևէ կերպ չի ազդում և, որոշ դեպքերում, այդպիսի սննդակարգը նույնիսկ հանգեցնում է սրտանոթային համակարգի հիվանդություններից մահվան ռիսկի մեծացման: Այս մասին գրվում է Lancet ամսագրում հրապարակված հոդվածում:

«Աղի չափավոր օգտագործումը որոշ չափով իջեցնում է ճնշումը, բայց այն հանգեցնում է մի շարք այլ հետևանքների, այդ թվում՝ որոշ հորմոնների մակարդակի բարձրացման, ինչը հաճախ գերակայում է ճնշման իջեցումից դրական արդյունքները: Սա շատ կարևոր նորություն է հիպերտոնիայով տառապող մարդկանց համար»,- նշում է Էնդրյու Մենտեն` Կանադայում Մաքմասթերի համալսարանից:

Գիտնականներն այսպիսի եզրակացության են հանգել՝ հետևելով ավելի քան 130.000 մարդկանց առողջությանն աշխարհի 49 երկրից: Ուսումնասիրության ընթացքում գիտնականները պարբերաբար արյան նմուշ են վերցրել մասնակիցներից, տվյալներ հավաքել նրանց սննդակարգի, վնասակար սովորությունների, հիվանդությունների մասին, որոնք ազդում են կյանքի տևողության և առողջության վրա:

Ուսումնասիրության արդյունքում գիտնականները եզրակացրել են, որ աղի փոքր քանակով սննդակարգը դրական ազդեցություն չի ունենում հատկապես, եթե մարդը չի տառապում բարձր ճնշման խնդիրներից:

Ավելին՝ գիտնականները պարզել են, որ կա որոշակի սահման՝ օրական մոտավորապես 3 գրամ աղ, որից պակասը սննդակարգում սկսում է բացասաբար ազդել օրգանիզմի վրա, այդ թվում՝ սրտանոթային համակարգի վիճակի վրա:

Հարցեր, պատասխաններ, մեկնաբանություններ