Սպիտակեցնող նյութերը զգալիորեն թուլացնում են երեխայի իմունային համակարգը. 1in.am

Mignews-ի փոխանցմամբ՝ սպիտակեցնող նյութերը զգալիորեն թուլացնում են երեխայի իմունային համակարգը՝ այն դարձնելով ավելի խոցելի բազմաթիվ վարակների, այդ թվում նաև գրիպի համար։ Նման եզրահանգման են եկել բելգիացի գիտնականները։

Նրանց կատարած հետազոտությանը մասնակցել է ավելի քան 9000 ընտանիք՝ 6-12 տարեկան երեխաներով, ովքեր ներկայացնում են Իսպանիան, Հոլանդիան ու Ֆինլանդիան։ Գիտնականները ծնողներին խնդրել են պատասխանել, թե արդյո՞ք տունը կարգի բերելու ժամանակ օգտագործել են սպիտակեցնող նյութեր, ինչպիսին քլորն է, և եթե այո, ապա որքան հաճախ։

Բացի այդ՝ նրանք ծնողներից խնդրել են պատասխանել, թե վերջին մեկ տարում իրենց երեխան արդյո՞ք հիվանդացել է անգինայով, օտիտով, գրիպով, սինուսիտով, բրոնխիտով, թոքաբորբով։ Արդյունքները վկայել են, որ Իսպանիայում ծնողների մոտավորապես 72 տոկոսը շաբաթական առնվազն մեկ անգամ օգտագործել է սպիտակեցնող նյութ, իսկ Ֆինլանդիայում՝ ընդամենը 7 տոկոսը։

Պարզվել է, որ այն ընտանիքներում, որոնք պարբերաբար օգտագործել են սպիտակեցնող նյութեր, երեխաները 20 տոկոսով ավելի շատ են հիվանդացել գրիպով։ Քլորի կիրառման պարագայում դա հասնում է մինչև 35 տոկոսի։

Հարցեր, պատասխաններ, մեկնաբանություններ