Էլեկտրոնային ծխախոտը թոքերում փոփոխություններ է առաջացնում՝ բջիջների մակարդակով. news.am

Էլեկտրոնային ծխախոտն այնքան էլ անվտանգ չէ, որքան ընդունված է կարծել: Դրանում պարունակվող որոշ արոմատիզատորներ կարող են մարդու թոքերում փոփոխություններ առաջացնել՝ բջիջների մակարդակով, հայտնում է American Thoracic Society-ում ներկայացված հետազոտությունը:

Ինչպես նշում են Հյուսիսային Կարոլինայի համալսարանի գիտնականները, 13 արոմատիզատորներից, որոնք հնարավոր եղավ ստուգել, 5-ը կարող են բացասաբար անդրադառնալ թոքերի վրա:

«Թոքային հյուսվածքների վրա տարբեր քիմիական նյութերի գոլորշիների ազդեցությունը հիմնականում հայտնի էր, - նշում է հետազոտության առաջատար հեղինակ Տեմպերանս Ռուելը, - մեր նոր հետազոտությունն օգնեց պարզել, որ 13 ուսումնասիրված արոմատիզատորներից  5-ը բացասաբար են անդրադառնում թոքերի վրա՝ չափաբաժնից կախված»:

Փորձարկումների ժամանակ մարդու շնչուղիների էպիթելիալ բջիջները ենթարկվել են արոմատիզատորների տարբեր չափաբաժինների ազդեցության՝ 30 րոպեի կամ 24 ժամվա ընթացքում: Հետազոտողները պարզել են, որ որոշ քիմիական նյութեր կարող են ազդել բջիջների կենսունակության վրա, ինչպես նաեւ կալցիումի՝ էպիթելիումի շնչառական ուղիներում պրոլիֆերացման վրա:

Հաշվի առնելով այն, որ էլեկտրոնային ծխախոտը բավականին տարածված է, դրանց բաղադրիչների եւ այդ բաղադրիչների՝ թոքերի վրա ազդեցության ավելի լավ ընկալումը շատ կարեւոր է, նշում են գիտնականները:

Այժմ գիտնականներն ավելի երկարատեւ ուսումնասիրություններ են իրականացնում՝ պարզելու, ինչպես են քիմիկատները, որոնք պարունակվում են էլեկտրոնային ծխախոտում, ազդում մարդու բրոնխերի վրա:

Հարցեր, պատասխաններ, մեկնաբանություններ