Թաց լողազգեստով մնալը բորբոքային հիվանդությունների աղբյուր է. սեքսոպաթոլոգ

Սեքսոպաթոլոգ Արսեն Գրիգորյանը այսօր լրագրողների հետ հանդիպմանն ասաց, որ մարդիկ հաճախ գնում են լողավազան կամ ծովափ և երկար ժամանակ մնում են թաց լողազգեստով, կամ նույնիսկ ճանապարհ ընկնում դրանցով, ինչն էլ հանգեցնում է սեռական մի շարք բորբոքային հիվանդությունների առաջացման։


«Եթե լողալուց հետո նորից ջուրը չեք մտնելու, անհրաժեշտ է փոխվել, իսկ հակառակ դեպքում՝ չորանալ արևի տակ: Լողազգեստները հիմնականում կարված են սինթետիկ կտորներից, որը երկար ժամանակ իր մեջ է պահում խոնավությունը: Հենց այդ խոնավ միջավայրը բակտերիաների զարգացման նպաստավոր պայման է»,- ասաց նա:


Հարցին, թե արդյոք ճիշտ է հասարակության մեջ տարածված այն կարծիքը, թե Սևանա լճում լողալուց հետո շատերը վարակվում են հերպես սիմպլեքս վիրուսով, նա պատասխանեց. «Մարդկանց մոտ 85%-ը վարակված են հերպես վիրուսով: Սևանում շատ բարենպաստ պայմաններ են մարդու իմունիտետի անկման համար: Արևի տակ կանգնելով վառվում ենք, գալիս ենք հովին՝ մրսում»:

Ըստ Արսեն Գրիգորյանի՝ երբ մարդու օրգանիզմի դիմադրողականությունն ընկնում է, այդ վիրուսը գլուխ է բարձրացնում։

Հարցեր, պատասխաններ, մեկնաբանություններ