Ինչո՞ւ չամուսնանալ մայիսին. աստղագետը բացատրում է օրացույցի աստղագիտական հիմքով

ՀՀ Գիտությունների ազգային ակադեմիայի Վիկտոր Համբարձումյանի տուն-թանգարանի տնօրեն, աստղագետ, տոմարագետ Գրիգոր Բրուտյանն այսօր կայացած ասուլիսին խոսեց «Մայիս-վայիս. ինչու՞ չի կարելի ամուսնանալ մայիս ամսին» թեմայի շուրջ։ 

Հարցին, թե այդ արգելքը սնահավատությո՞ւն է, թե հիմնավորված փաստարկներ, տոմարագետը բացատրեց. «Նախահայկյան օրացույցի մեջ մենք գտնում ենք մայիսին չամուսնանալու պարզ բացատրությունը: Դա գալիս է զուտ օրացույցի աստղագիտական հիմքից: Կան անդրաշխարհի սկզբունքներ, որոնցով շատ բաներ արգելվել են, արգելքների շրջանն ավարտվել է Ամանորի տոնով, այդ արգելքներից էր նաև պսակը»:

Աստղագետի ներկայացմամբ՝ դա գալիս է հնագույն կրոնական պատկերացումներից, որն ունի աստղագիտական հիմնավորում: Հռոմեական օրացույցն իր մեջ ունի հենց մայիսին ամուսնություն անելու արգելք:

«Անձամբ ես կողմնակից եմ ավանդույթի պահպանմանը, քանի որ դա պահպանելը միշտ ճիշտ է, քանի որ այն մտածել են շատ խելացի մարդիկ և անցել է ժամանակի բովով»,-ասաց նա՝ նշելով, որ մայիսին չամուսնանալու պարագան համարվում է նախաքրիստոնեական արգելք։

Իսկ թե արգելքը խախտելու դեպքում ինչ վատ կանխատեսումներ կան, Գրիգոր Բրուտյանը մեկնաբանեց. «Եթե քեզ ասում են, որ ինչ-որ բան չի կարելի անել, իսկ դու անում ես, մեխանիկորեն սկսում ես մտածել, որ դու վատ բան ես արել, քո գիտակցությունը, որ դու արել ես վատ արարք, միտքդ զբաղեցվում է դրանով և անկախ քո կամքից՝ ստացվում է, որ ինքդ ես քեզ պատժում»:

Հարցեր, պատասխաններ, մեկնաբանություններ