Առանց մեր տղամարդկանց մեր կյանքը ոչինչ է. Խաչանուշ Հակոբյան

Ամեն ինչը աշխարհում, կյանքում ոչինչ է դառնում, երբ մարդ կորցնում է իր առողջությունը: Այս մասին այսօր՝ մարտի 8-ին, լրագրողների հետ հանդիպմանն ասաց Հայ-Ամերիկյան առողջության կենտրոնի գործադիր տնօրեն Խաչանուշ Հակոբյանը:

«Սա ամենաստվածահաճո մասնագիտությունն է, չկա ավելի մեծ բերկրանք, քան կյանք պարգեւել մարդուն: Երբ չունես այդ առողջությունը, ոչինչ չի երեւում աչքիդ: Մոտ 4000  փրկված կյանքեր խոսում են  բժիշկների  աշխատանքի մասին: Աշխատանքը շարունակվում է, կարողանում ենք օգնել բազմահազար ընտանիքների` հաղթահարելու չարիքը»,- նշեց նա:

Խաչանուշ Հակոբյանն մաղթեց ընտանիքներին առողջություն, անամպ երկինք, ուզում է, որ չլինեն այն կազմակերպությունները, որոնք աշխատում են կանանց նկատմամբ տղամարդկանց բռնությունների գործերով, ամուր ընտանիքներ է ուզում, առողջ մայրեր:  «Իհարկե, առանց մեր տղամարդկանց մեր կյանքը առ ոչինչ է, ներդաշնակություն, հարգանք եւ փոխադարձ զիջումներ եմ ուզում մեր ընտանիքներում»,- նշեց նա:

Ասուլիսի  մյուս բանախոսը՝ «Զինվոր» հ/կ  հասարակական խորհրդի նախագահ Մարգարիտա Խաչատյանը առաննացրեց որդեկորույս մայրերին:  Նա նշեց, որ մինչեւ միակ որդու կորուստը, իր դերն  ու նշանակությունը չի տեսել հայոց բանակում, սակայն  1996թ զգացել է մայրական խորհուրդը, մայրական ձեռքը բանակում:  Նա շեշտեց, որ մոր վստահության քվեն ձեռք է բերել զինծառայողների, սպաների շրջապատում, իր դերի եւ նշանակության գնահատումը տալիս է զինվոր:

«Կնոջ դերը բանակում ավելի մեծ տեղ է գրավում: Մենք որդեկուրույս մայրերով, մեր որդիների փոխարեն պատրաստ ենք հայրենիքը պաշտպանելու, եթե պատերազմ լինի»,- նշեց նա՝ տեղեկացնելով, որ կազմակերպության հասարակական խորհրդի 35 կանայք շրջում են զորամասերում, առաջին գծում:

Ի դեպ,  ՀՀԿ-ական պատգամավոր Շուշան Պետրոսյանը եւս պետք է ներկա լիներ ասուլիսին, սակայն չէր եկել` ժամանակի սղության պատճառով:

Հարցեր, պատասխաններ, մեկնաբանություններ