Գիտնականն ասել է` ինչպես կարելի է ապրել մինչև 150 տարեկան և ինչի հաշվին. tert.am

Բրիտանիայում գործող հետազոտական ընկերության ղեկավար, լատվիացի գիտնական Ալեքս Ժավորոնկովն ասել է, թե ինչպես կարելի է ապրել ընդհուպ մինչև 150 տարեկան: Daily Mail-ին պրոֆեսորն ասել է, որ նման երկարակեցության կարելի է հասնել սեքսի հաշվին, ավելի ճիշտ` սեքսից հրաժարվելու: Նա բացատրել է, որ իրականում սնունդն ու մարզումներն այնքան էլ կապ չունեն երկարակեցության հետ: Ըստ նրա, երկարակեցության վրա կենտրոնանալու համար մարդուն հարկավոր է հրաժարվել այն ամենից, ինչը «շեղում է». «շեղող բաների» թվում նա նշել է «հարաբերությունները, ամուսնությունը, երեխաներ ունենալը և անգամ նյութական ունեցվածքը»:

36-ամյա պրոֆեսորը հաշվարկել է, որ, օրինակ, ինքը կարող է ապրել դեռևս 114 տարի, իսկ եթե «ամեն բան լավ գնա», ապա գուցե 130 տարի էլ ապրի: Նա անգամ իր հաշվով գրազ է եկել մեկ այլ գիտնականի հետ: 1 մլն դոլարանոց գրազը կհաղթի նա, ով ապրի մինչև 100 տարեկան:

Հետաքրքրական է, որ այս գիտնականը, միաժամանակ, թե՛  լուրջ, թե՛ էքսցենտրիկ մասնագետի համարում ունի:

Աղբյուրը նշում է նաև, որ Առողջապահության համաշխարհային կազմակերպության  անցած շաբաթ արված կանխատեսման համաձայն` առաջիկայում մինչև 100 տարեկան ապրելը պետք է նորմա դառնա աշխարհի բնակչության համար:

Daily Mail-ը, իր հերթին, կանխատեսում է, որ դրան հասնելու լատվիացի գիտնականի տարբերակը պետք է որ այնքան էլ դուր չգա մարդկանց:

Հարցեր, պատասխաններ, մեկնաբանություններ