Սպորտը չի օգնի նիհարել, բայց կմեծացնի կյանքի տեւողությունը. news.am

Սպորտով զբաղվելը չի օգնի ազատվել ավելորդ քաշից, բայց կօգնի վերացնել ներքին օրգանների ավելորդ ճարպը: Դրա շնորհիվ ավելի առողջ կլինեք եւ ավելի երկար կապրեք, պնդում են Liverpool John Moores University-ի եւ Radboud University-ի գիտնականները:

Շատերը կարծում են, թե սպորտը կարող է օգնել նիհարելուն, բայց իրականում ինտենսիվ ֆիզիկական ծանրաբեռնվածությունը չի հանգեցնում ավելորդ կգ-ների անհետացման, պնդում են գիտնականները: 117 հետազոտության մետավերլուծությունը ցույց է տվել, որ ինտենսիվ մարզումների 2-6 ամսից հետո հետազոտությունների մանսակիցների մոտ քաշի ոչ մի կորուստ չի արձանագրվել, որովհետեւ այն նվազագույն էր: 

Բայց լավ նորությունն այն է, որ ֆիզիկական ծանրաբեռնվածությունն այրում է ներքին ճարպը, որը կուտակվում է ներքին օրգանների շուրջը եւ հանգեցնում առողջական լուրջ խնդիրների, ներառյալ` երկրորդ տեսակի դիաբետի եւ սրտանոթային հիվանդությունների: Ներքին ճարպի առկայությունը կարող է նաեւ էականորեն նվազեցնել կյանքի տեւողությունը:

Այսօր հնարավոր է շատ մարդկանց հանդիպել, ովքեր, թվում է, սլացիկ են, բայց իրականում ներքին ճարպակալում ունեն. նրանց ներքին օրգանները ճարպով են շրջապատված:

Գիտնականները պնդում են, որ ներքին ճարպն անհամեմատ ավելի մեծ վտանգ է ներկայացնում առողջության համար, քան` ենթամաշկայինը: Ոչ մի վատ բան չկա նրանում, որ կրճատվեն օգտագործվող կալորիաները, սակայն բազմոցից վեր կենալը եւ մարզասրահ գնալն անհամեմատ ավելի կարեւոր է ներքին ճարպի դեմ պայքարի համար, ասում են նրանք:

Մետավերլուծության տվյալները ցույց են տվել, որ երկուսից վեց ամսվա ինտենսիվ մարզումները հանգեցնում են ամբողջ քաշի միջինը ընդամենը մեկ տոկոսի վերացման, ինչը մոտավորապես 4 կգ է կազմում: Անհամեմատ ավելի էական արդյունք է դիտվում ներքին ճարպի դեմ պայքարում. այդ ժամանակահատվածում սպորտի շնորհիվ հնարավոր է ազատվել ճարպի  6 տոկոսից: Բայց ինչու սպորտը չի օգնում նիհարելուն. միայն այն պատճառով, որ ֆիզիկական մարզումները նպաստում են մկանային զանգվածի զարգացմանը, իսկ մկանները ճարպից ավելի ծանր են:

Հարցեր, պատասխաններ, մեկնաբանություններ