Տեղեկատվության տարբեր աղբյուրների միաժամանակյա օգտագործումը կարող է ընկճախտի պատճառ դառնալ

Հեռուստացույց դիտելն ու միաժամանակ բջջայինով զբաղվելը վնասակար են առողջությանը: Նման եզրակացության են հանգել Միչիգանի պետական համալսարանի գիտնականները: Այս մասին հայտնում է medikforum.ru-ն: 

Չարժե աշխատել համակարգչով, երբ միաժամանակ հեռուստացույց է միացված, կամ տեսախաղ խաղալ՝ միաժամանակ լսելով ռադիո: 

Ամերիկացի հետազոտողները ենթադրում են, որ մարդու ուղեղում ստացվող բազմազան տեղեկատվությունը ծանրաբեռնում է նրան՝ մեծացնելով անհանգստության և ընկճախտի առաջացման ռիսկը: Հետազոտության հեղինակ Մարկ Բեքերը անձամբ զարմացել է՝ ակնհայտ կապ հայտնաբերելով բազմահանձնարարության, ինֆորմացիայի մշակման և հոգեկան առողջության խնդիրների միջև: Գիտնականները դեռևս չեն կարող ասել, թե ինչով է դա բացատրվում: Հետազոտությանը մասնակցել է 310 երիտասարդ, որոնք հայտնել են օրվա ընթացքում ինֆորմացիայի աղբյուրների օգտագործման տևողությունն ու մի քանի աղբյուրի միաժամանակյա համադրման հնարավորությունը:

«Մենք չգիտենք` բազմահանձնարարությունը ընկճախտի համախտանիշների առաջացման պատճա՞ռ է, թե՞ դեպրեսիվ մարդիկ են հաճախ ինֆորմացիայի մի քանի աղբյուր միաժամանակ կիրառում` խնդիրների բեռից թեթևանալու և շեղվելու համար»,-ասել է Բեքերը:

Հարցեր, պատասխաններ, մեկնաբանություններ