Այն մարդիկ, ովքեր ձեզ դիմում են օգնության, մի եղեք անտարբեր. ինքնասպանությունները կանխելու տարբերակ

Այսօր մամուլի ասուլիսում հոգեբան Միհրդատ Մադաթյանը  և  սոցիոլոգ`  Ահարոն  Ադիբեկյանը խոսեցին ինքնասպանություն գործելու դրդապատճառների մասին: Ահարոն Ադիբեկյանը հայտնեց, որ աշխարհում տարեկան մեկ միլիոն հարյուր հազար մարդ ինքնասպան է լինում, չնայած կան նաև ինքնասպանության դեպքեր, որոնք չեն բացահայտվում:  «Ինքնասպանությունը ոչ միայն հոգեբանական խնդիր է, այլ նաև՝  սոցիալական»,- ասաց նա և  նշեց, որ մենք պետք է ուսումնասիրենք ինքնասպանություն գործողի ապրած միջավայրը և տեսնենք, թե ինչն է պատճառ հանդիսացել՝  ինքնասպան լինելու համար:

Ըստ նրա՝ ինքնասպանություն գործելը կապված չէ տնտեսական իրավիճակի հետ, որովհետև տնտեսապես զարգացած երկրներում, օրինակ՝ Շվեյցարիայում, հարյուր հազար մարդուն բաժին է ընկնում  30 ինքնասպանության դեպք, իսկ Հայաստանում՝ 1-2: «Լինել հարուստ երկիր, դա դեռ ոչինչ չի նշանակում»,- ասաց նա: Սոցիոլոգն ասաց, որ ինքնասպանների մեծ մասը  դեպրեսիվ վիճակում են գտնվում:

«Այդ մարդկանց նկատմամբ պետք է լինել առավել ուշադիր: Ընդհանրապես ինքնասպանների 80 տոկոսը նշան է տալիս, որ պատրաստվում է ինքնասպան լինելու: Ի դեպ՝  նրանք մեծամասամբ էլի են ինքնասպան լինելու փորձ արել, սակայն դա անհաջող է ավարտվել: Նրանք հիմնականում ինքնամեկուսացված մարդիկ են: Եթե ինքնասպանին մեկը այդ պահին ձեռք է մեկնում, կոնտակտի մեջ է մտնում, ապա տասը հոգուց ութին  հնարավոր է փրկել: Այն մարդիկ, ովքեր ձեզ դիմում են օգնության, մի եղեք անտարբեր»,- ասաց Ահարոն Ադիբեկյանը և կոչ արեց օգնել նույնիսկ փողոցում հանդիպած անծանոթին:

Ահարոն Ադիբեկյանը նշեց, որ ամեն ինքնասպան իր հետևից թողնում է առնվազն վեց հոգի, ովքեր դառը ապրումների մեջ են ընկնում այդ դեպքից հետո և չեն կարողանում իրենց ներել, որ չեն կարողացել կանխել դա:

Չնայած անցած տարի ինքնասպանությունների թվի կրճատում է եղել։ Սոցիոլոգն ասաց, թե պետք է հաշվի առնել, որ խոցելի խումբը մեծամասամբ արտագաղթել է:

Հոգեբանը ևս համաձայն էր, որ ինքնասպանություն գործողները հոգեբանական անտարբերության են մատնված: Միհրդատ Մադաթյանը վտանգ է տեսնում նաև  էմոյական շարժումների մեջ:

Հարցեր, պատասխաններ, մեկնաբանություններ