3D-ֆիլմները հանգեցնում են նևրոզների, փսիխոզի եւ ֆոբիաների. մեկնաբանություններ

Զվարճանքի ինդուստրիան զարգանում է օրեցօր. եթե մի քանի տասնամյակ առաջ գունավոր հեռուստացույցը եզակի երեւույթ էր, ապա հիմա սեւ-սպիտակ «տուփեր» այլեւս չկան: Անկասկած, այդ ինդուստրիայի ամենակարեւոր բաղադրիչներից մեկը կինեմատոգրաֆիան է: Ֆիլմերի արտադրության մեջ մոդայի վեջին ճիչը կարելի է համարել 3D-ֆիլմերի ստեղծումը կամ, ավելի ճշգրիտ, ստերեոկենմատոգրաֆիան:

Դա համակարգ է, որը երրորդ չափման առկայության տպավորություն է  ստեղծում կամ հանդիսատեսի մոտ տարածության խորության պատկեր է առաջացնում:Վերջին շրջանում արտասահմանյան մի շարք լրատվամիջոցներում հրապարակումներ եղան այն մասին, որ 3D-ֆիլմերը վնասակար են մարդկանց առողջության համար: Հիմնականում խոսքը տեսողության եւ կենտրոնական նյարդային համակարգի մասին է: Ամերիկյան գիտնականների վերջին հետազոտությունների արդյունքներով, ֆիլմերի դիտումը 3D-ակնոցով կարող է ոչ միայն վատացնել տեսողությունը, այլեւ թափահարելու էֆեկտ առաջացնել:Ակնաբույժ Հերմինե Գամագելյանի կարծիքով, 3D-ֆիմլերի դիտումից հետո տեսողության վատացման հարցը վիճելի է: «Ամեն ինչ կախված է նրանից, թե մարդը որքան ժամանակ է ծախսում 3D –ֆիլմեր դիտելու վրա:  Եթե չչարաշահվի դա, ապա շաբաթվա մեջ 1 – 2 անգամ նման ֆիլմերի դիտումն առողջությանը չի կարող վնասել: Մյուս կողմից, դրա չարաշահումը, ինչպես եւ համակարգչի, հեռուստացույցի պարագայում, կարող է տեսողությանն իրական վնաս հասցնել»,-նշեց մասնագետը:

Ինչ վերաբերում է նյարդային համակարգին, ապա նյարդաբան Թամար Ավետիսյանը NEWS.am-ին պատմեց, թե նման ձեւաչափով ֆիմլերն ինչպիսի ազդեցություն կարող են ունենալ մարդու վրա. «Ֆիլմերը դիտելիս` մարդն սկսում է իրեն զգալ կատարվածի մաս, ինչը հաճախ առաջացնում է վախի, սթրեսի զգացողություն, նեւրոզներ»,-նշեց նա` ընդգծելով, որ 3D-ֆիլմերը հատկապես բացաասաբար են անդրադառնում երեխաների եւ դեռահասների վրա:Այդ ձեւաչափով ֆիլմերի դիտումից հետո գլխացավերն, ըստ բժշկի,  կապված են էնդոկրին համակարգի աշխատանքի խախտումների հետ. «Նման «կենդանի» ապրումները կարող են ադրենալինի եւ մյուս ուժեղ նեյրոմեդիատորների կտրուկ սինթեզ առաջացնել, ինչն էլ իր հերթին անդրադառնում է մարդու ընդհանուր ինքնազգացողության վրա»,-նկատեց նա: Ամփոփելով` Թ. Ավետիսյանն ընդգծեց, որ 3D-ֆիլմերի դիտումը  միանշանակ վտանգավոր է` հատկապես երեխաների եւ դեռահասների համար:

Երեւանում 3D ձեւաչափով ֆիլմեր ցուցադրում են միայն «Մոսկվա» կինոթատրոնում, որի գլխավոր մենեջեր Մարատ Սաֆարյանը NEWS.am-ի թղթակցի հետ զրույցում անդրադարձավ խնդրին. «Բժիշկներն ավելի լավ կասեն այդ մասին: Սակայն ես կարող եմ այլ բան ասել. եթե աշխարում կան տարբեր 3D ակնոցներ, որոնք թույլ են տալիս տեսնել ծավալային պատկերը, ապա այդ մոդելի ակնոցները հենց մեզ մոտ են: Մենք հանդիսատեսին հնարավորություն ենք տալիս  ֆիլմեր դիտել լավագույն որակով` ամենաժամանակից սարքավորումների օգնությամբ»,-վստահեցրեց նա:Միաժամանակ զրուցակիցը թերահավատորեն է վերաբերվում այն պնդումներին, թե 3D-ֆիլմերն ուղղակի վնաս են հասցնում առողջությանը:

Հարցեր, պատասխաններ, մեկնաբանություններ