Խոնավացնող միջոցները օգտագործել տնից դուրս գալուց մեկ ժամ առաջ

Մաշկի խնամքի համար ձմռանը գոյություն ունի «ոսկե կանոն»: Այս մասին այսօր լրագրողների հետ հանդիպման ժամանակ ասաց մաշկաբան, բժիշկ-կոսմետոլոգ Գայանե Վարդանյանը։

Ըստ նրա, հարկավոր է միշտ հիշել, որ ձմռանը  խոնավացնող բոլոր միջոցները պետք է օգտագործել տնից դուրս գալուց մեկ ժամ առաջ: Պետք է ուշադրություն դարձնել նաև դեկորատիվ կոսմետիկային, եթե այն խոնավեցնող հատկություն ունի, ուրեմն այս կանոնը գործում է նաև այս դեպքում:

«Չոր մաշկի դեպքում հատկապես հնարավորինս սնուցում ենք մաշկը, իսկ խոնավացնող բոլոր միջոցները փորձում ենք օգտագործել երեկոյան` որպես խնամքի միջոց»,- ասաց մասնագետը:

Բժիշկ-կոսմետոլոգը նշեց, որ ջերմաստիճանի իջնելու դեպքում, ավելի շատ է հարկավոր ուշադրություն դարձնել մաշկին, քանի որ այն ջրի կարիք է ունենում:

«Երբ իջնում է ջերմաստիճանը, կտրուկ նվազում է ճարպագեղձի ֆունկցիան, այսինքն ճարպ շատ քիչ է արտադրվում, նրա փափկեցնող և սնուցող ֆունկցիան կորում է և շատ հաճախ մենք նկատում ենք, որ ճարպոտ մաշկը դառնում է նորմալ տիպի, նորմալ մաշկը չորանում է, իսկ չոր մաշկը գերչոր և գերզգայուն է դառնում»,- ասաց նա։

Գ. Վարդանյանը նշեց, որ ձմռանն առաջացած մաշկի ջրազրկման վտանգը կախված է մթնոլորտի հարաբերական խոնավության մակարդակի իջնելուց: Այդ ժամանակ մաշկի մակերեսից ավելի շատ հեղուկ է գոլորշիանում, ինչը կրկին բերում է մաշկի չորության: Բացի այդ, նա նշեց, որ ձմռանը ցրտից փոխվում է նաև մաշկի գույնը:

Մասնագետը վերջում նաև նշեց, որ հարկավոր է ուշադրություն դարձնել տան ջեռուցման ժամանակ օդի խոնավության պահպանմանն ու լողանալիս ջրի ջերմաստիճանին, քանի որ չոր օդն ու շատ տաք ջուրը հանգեցնում են մաշկի չորացմանն ու թեփոտմանը:

Հարցեր, պատասխաններ, մեկնաբանություններ