Կանաչ թեյը և սուրճը կարող են փրկել դիաբետիկների կյանքը. РИА

РИА "Новости"-ն` հղում անելով Կյուսյու Համալսարանի գիտնականներին, հայտնում է, որ կանաչ թեյի և սուրճի ամենօրյա օգտագործումը ընդունակ է 2-րդ տիպի դիաբետիկների մոտ իջեցնել մահացության վտանգը 63 տոկոսով: Գիտնականները ստուգել են այդ ըմպելիքների արդյունավետությունը` առանձին վերցրած և միասին:

Նրանց հետաքրքրել են ամենաքիչը 5 տարի առաջ ախտորոշված 2-րդ տիպի 4923 դիաբետիկների ցանկացած պատճառից մահվան փաստերը: Հաշվի են առնվել կանոնավոր ֆիզիկական մարզումները, ծխելը, ալկոհոլի օգտագործումը, քնի տևողությունը, թեյի և սուրճի օգտագործումը: Պարզվել է, որ 607 մասնակիցներ կանաչ թեյ չեն օգտագործել ընդհանրապես, 1143-ը` խմել են օրը մեկ անգամ, 1384-ը` երկու անգամ, իսկ 1784-ը` չորս և ավելի անգամ: 99 մասնակից սուրճ չեն խմել, 1306-ը` խմել են օրը մեկ բաժակից քիչ, 963-ը՝ ամեն օր խմել են մեկ բաժակ, իսկ 1660-ը` 2 և ավելի բաժակ:
Հետազոտման 5 տարիների ընթացքում մահացել են 309 հիվանդ, հիմնականում քաղցկեղից և սիրտ-անոթային հիվանդություններից: Մահվան ամենացածր ցուցանիշները դիտվել են սուրճ և կանաչ թեյ շատ օգտագործողների մոտ:

Արդյունավետությունը բացատրվում է սուրճի և կանաչ թեյի յուրահատուկ կազմով: Կանաչ թեյը պարունակում է հակաօքսիդանտներ և հակաբորբոքիչներ: Սուրճը նույնպես պարունակում է մեծ քանակի ակտիվ նյութեր: Բացի այդ, սուրճը դրական է ազդում ինսուլինի արտադրության վրա:

Հարցեր, պատասխաններ, մեկնաբանություններ