Շաքարի արհեստական փոխարինիչները ախորժակաբեր են եւ ստիպում են շատ ուտել. գիտնականներ. news.am

Շաքարի արհեստական փոխարինիչներն այնքան էլ անվնաս չեն, որքան կարող է թվալ առաջին հայացքից. իրականում դրանք ախորժակբեր են, մեծացնում են քաղցի զգացումը եւ մարդուն ստիպում են չափից շատ ուտել:  Ավելին, հաճախ դրանք նաեւ քնի խանգարումներ են առաջ բերում: Այդ մասին զգուշացնում են University of Sydney-ի գիտնականները (Ավստրալիա):

Նրանց անցկացրած հետազոտությունը ցույց է տվել, որ շաքարի փոխարինիչների ազդեցության տակ օրգանիզմում դիսբալանս է առաջանում ստացված էներգիայի եւ քաղցր համի զգացողության միջեւ: Արդյունքում օրգանիզմը սկսում է ավելի շատ սնունդ պահանջել` լրացնելու կալորիաների պակասը: Շաքարի փոխարինիչների օգտագործումից հետո սննդի կալորիականությունն աճում է միջինը  30 տոկոսով:

Այսպես, կարելի է եզրակացնել, որ շաքարի փոխարինիչների օգտագործումը բոլորովին չի օգնում կրճատել սննդի կալորիականությունը եւ նիհարել: Արդյունքը կարող է հակառակը լինել:

«Շաքարի փոխարինիչների օգտագործման ամենամեծ վտանգը հագեցման մեխանիզմում, այն է` սննդի եւ խմիչքի կալորիականության գնահատման համակարգում հնարավոր խափանումներն են: Դրա հետեւանքով մարդկանց մոտ ավելորդ քաշի հետ կապված խնդիրներ են առաջանում», - ասել են հետազոտողները:

Բացի այդ, գիտնականները նկատել են, որ քաղցրացուցիչները նպաստում են հիպերակտիվության առաջացմանը, որը վերափոխվում է քնի որակի նվազման եւ անքնության: Ի դեպ, այդպիսի ախտանիշներ հաճախ են դիտարկվում քաղցելու ընթացքում:

Հարցեր, պատասխաններ, մեկնաբանություններ