Որոշ սննդամթերքներ ուղեղը «խուլ» են դարձնում հագեցման վերաբերյալ ազդանշանների հանդեպ. news.am

Որոշ սննդամթերքներ ճարպերի այնպիսի տեսակներ են պարունակում, որոնց ազդեցությամբ խախտվում են ախորժակի մեխանիզմները, ինչի հետեւանքով մարդը կալորիական սննդի հակում է զգում եւ ի վիճակի չի լինում վերահսկել այն: Նման եզրակացության են հանգել ամերիկացի նյարդաբանները Հյուսիս-արեւմտյան համալսարանից եւ Ցինցինատիի համալսարանից: 

Գիտնականների աշխատանքը ցույց է տվել, որ որոշ ճարպային մոլեկուլներ ճնշում են ուղեղային ռեցեպտորների զգայունությունը լեպտինի եւ ինսուլինի հորմոնների տատանումների հանդեպ: Այդ հորմոնները չափազանց կարեւոր են քաշի կարգավորման գործում, որովհետեւ հենց դրանց հետ են կապված քաղցի սրության եւ սննդի ընդունման գործընթացում հագեցման զգացողությունները:

Ամերիկացի բժիշկներն այն եզրակացության են հանգել, որ ճարպոտ սնունդն ուղեղը «խուլ» է դարձնում լեպտինի եւ ինսուլինի մակարդակների վերաբերյալ օրգանիզմի ազդանշանների հանդեպ: Միաժամանակ, բժիշկները կարծում են, որ նույնիսկ մեկ անգամ ճարպոտ եւ կալորիական ուտեստ օգտագործելը կարող է բավարար լինել, որպեսզի ուղեղում բացասական փոփոխություններ տեղի ունենան:

«Քաղցի վերահսկողության առումով ուղեղի ամբողջ աշխատանքը կարող է փոխվել կարճ ժամանակահատվածի ընթացքում, եթե մենք ընդամենը մեկ անգամ զիջենք քաղցրեղեն ուտելու ցանկությանը», - նշել են աշխատանքի հեղինակները:

Գիտնականները պարզել են, որ այդ մեխանիզմում առանձնահատուկ դեր է կատարում պալմիտինաթթուն` ճարպային հագեցած թթու, որն առկա է կենդանական ճարպերի եւ բուսական յուղերի մեծամասնությունում: «Հենց այդ նյութն է ուղեղին «ասում», որ կարիք չկա դադարեցնել սննդի ընդունումը», - ընդգծել են մասնագետները: Պալմիտինաթթու պարունակում է կաթնամթերքում, աղանդերում եւ  արդյունաբերական արտադրության թխվածքներում: Ուղեղի վրա նման ազդեցություն են ունենում նաեւ մոնոչհագեցած ճարպաթթուները եւ օլեինաթթուն, կարծում են բժիշկները. դա են ցույց տվել կենդանիների վրա իրականացված թեստերը:

Գիտնականները ենթադրել են, որ ճարպոտ քաղցրեղենի օգտագործման հետեւանքը կարող է դրսեւորվել երեք օրվա ընթացքում: Այլ կերպ ասած, ճարպոտ ուտեստներով ճաշելուց կամ ընթրելուց հետո մարդու օրգանիզմում դեռեւս երեք օրվա ընթացքում խախտված կլինեն ախորժակի մեխանիզմները եւ նա իրեն մշտապես քաղցած կզգա:

Հարցեր, պատասխաններ, մեկնաբանություններ