Գիտնականները խորհուրդ են տալիս ընթրիքին, որպես քնաբեր, բրինձ օգտագործել.news.am

Ճապոնացի գիտնականները քնի խանգարում ունեցող մարդկանց խորհուրդ են տալիս երեկոյան սննդակարգի մեջ բրինձ ներառել: Նրանք պարզել են, որ այն, մեծ քանակությամբ կիրառման դեպքում, կարող է խորը քուն պարգեւել՝ ի տարբերություն մակարոնեղենի, ինչն անքնության խթան է: Երեւույթի հիմքում, մասնագետների մեկնաբանմամբ, սննդամթերքի գլիկեմիկ ինդեքսն է:

Սննդամթերքի՝ բարձր գլիկեմիկ ցուցանիշ ունեցող տեսակները, օրինակ՝ բրինձը, առավել արագ են արյունը շաքարով հագեցնում: Բացի այդ, հիշյալ ազդեցությունը կարող է ավելի երկար տեւել: Մյուս կողմից, ցածր գլիկեմիկ ինդեքսով բնորոշվող սննդատեսակները արյան մեջ շաքարի մակարդակի կարճաժամկետ եւ աննշան աճ են խթանում:

Սննդամթերքի բարձր գլիկեմիկ ինդեքս ունեցող տեսակների, քնի որակի վրա ազդեցությունը քնկոտություն առաջացնող ամինաթթվի՝ տրիպտոֆանի արդյունավետությամբ է բացատրվում: Ածխաջրատներով հարուստ բարձր գլիկեմիկ ինդեքս ունեցող սննդատեսակները դեպի ուղեղ առաքվող տրիպտոֆանի բաղադրության աճ են խթանում: Վերջինս, տեղ հասնելուն պես, սերոտոնինի է վերածվում, այնուհետեւ՝ մելատոնինի, ինչը քնելու ցանկություն կարող է հրահրել, տեղեկացնում է Daily Mail-ը:

Հետազոտության ընթացքում 1848 ճապոնացի բանվորների (1164 տղամարդ եւ 684 կին) ամենամյա բժշկական հետազոտության արդյունքներն են վերլուծվել: Մասնակիցների քնի որակի գնահատման համար հետազոտական խմբի անդամները «քնի որակի ինդեքս» են կիրառել, ինչը հետեւյալ փոփոխականների համադրությամբ է որոշվում. լույսն անջատելուց հետո քնելու համար պահանջվող ժամանակը, քնի տեւողությունը, արդյունավետությունը, խանգարումները, դեղերի կիրառությունը եւ ինքնազգացողությունը հաջորդող օրվա ընթացքում: Սննդակարգի մեջ առավել մեծ ծավալներով բրինձ ներառող մասնակիցների մոտ քնի սանդղակի առավել բարձր մակարդակ է գրանցվել: Ասել է թե՝ այդ մարդիկ, մյուս մասնակիցների համեմատ, ավելի լավ են քնել:

Իսկ ահա մակարոնեղենին նախապատվություն տվողների մոտ քնի հաճախակի խանգարումներ են արձանագրվել:

Հետազոտության արդյունքները PLoS ONE ամսագրում են հրապարակում գտել:

Հարցեր, պատասխաններ, մեկնաբանություններ