Մրգերը ինֆարկտի եւ ինսուլտի առաջացման ռիսկը նվազեցնելու ներուժ ունեն. med.news.am

Օքսֆորդի համալսարանի գիտնականների նախաձեռնությամբ իրականացված հետազոտության արդյունքները փաստում են, որ մրգերը պետք է մարդու ամենօրյա սննդակարգի պարտադիր բաղադրիչը լինեն:

Դրանց ամենափոքր չափաբաժիններն անգամ սրտամկանի ինֆարկտի եւ գլխուղեղի  ինսուլտի առաջացման ռիսկը 40 տոկոսի չափով կարող են նվազեցնել:

Գիտնականները յոթ տարի շարունակ հետազոտության մեջ ընդգրկված  գրեթե 500 հազար մասնակցի առողջական վիճակն են ուսումնասիրել: Պարզվել է, որ սննդակարգում ամեն օր մրգեր ներառող մարդիկ առավել հազվադեպ են սրտային հիվանդությունների և գլխուղեղի ինսուլտի երկու տեսակների հետ առնչվում: Մրգերի օգտագործման հաճախականությունը հետազոտությունների  շրջանակներում հինգ չափանիշներով է բնորոշվել՝ “երբեք”,  “ամիսը մեկ անգամ”, “շաբաթական 1-3 անգամ”, “շաբաթական 4-6 անգամ” և “ամեն օր”: Վերլուծելով  արդյունքները,  հետազոտողները նկատել են, որ որքան բարձր է հիշյալ չափանիշը, այնքան բարդությունների առաջացման ռիսկն առավել ցածր է:

Միրգ չօգտվող մասնակիցների համեմատ, ամեն օր ընդամենը մեկ միրգ օգտագործող մարդկանց մոտ սիրտ-անոթային հիվանդությունների առաջացման ցուցանիշը 15 տոկոսի չափով, իշեմիկ ինսուլտինը՝ 25 տոկոսով, իսկ հեմոռագիկ ինսուլտի առաջացման ռիսկը՝ 40 տոկոսի չափով ցածր են գնահատվել: Բացի այդ, մրգերի սիրահարների մոտ զարկերակային ճնշման  սիստոլիկ և դիաստոլիկ ցուցանիշները 3,4 եւ 4,1 մմ-ով սնդիկի սյան հաշվարկով ցածր են արձանագրվել, հաղորդում է The Telegraph-ը:

Սննդակարգում առավել հաճախ մրգեր ներառող մարդկանց մեծ մասը օրական դրանցից մեկուկես չափաբաժին է վայելում: Ընդ որում, միավոր չափաբաժինն օրինակ, մեկ ոչ մեծ խնձորի կամ նարնջի է հավասար:

Հետազոտության բոլոր մասնակիցների մոտ ուսումնասիրությունների մեկնարկի պահին առողջական լուրջ խնդիրներ չեն բացահայտվել: Յոթ տարիների ընթացքում նրանցից 19300-ի պարագայում սրտային հիվանդություններ են առաջացել և 196989 դեպքերում՝ ինսուլտի առաջացում է արձանագրվել:

Հարցեր, պատասխաններ, մեկնաբանություններ