ԱՀԿ փորձագետներն աղի օգտագործման նոր չափաբաժիններ են կազմել

Առողջապահության համաշխարհային կազմակերպությունը (ԱՀԿ) առաջին անգամ առաջարկություններ է հրապարակել աղի օգտագործման վերաբերյալ` երեխաների մասով, հաղորդում է Reuters-ը:

Հայտնի է, որ աղի սպառման բարձր քանակը հանգեցնում է հիպերտոնիայի, սրտի հիվանդության և կաթվածի:

Խնդիրները կարող են առաջանալ նույնիսկ մանկական տարիքում, և դրանք կուտակային ներգործություն ունեն:

ԱՀԿ նոր ուղղենիշները հիմնվում են առաջարկությունների վրա, որոնք կազմվել են՝ հաշվի առնելով չափը, տարիքը և էներգիայի պահանջը: Դրանք գործում են 2 տարեկանից բարձր երեխաների համար:

ԱՀԿ-ն վերանայել է նաև չափահաս մարդկանց համար առաջարկները: Ներկայում աղի օգտագործման օրական չափը 2000 միլիգրամից ցածր պետք է լինի: Դրան գումարած, անհրաժեշտ է ամեն օր նվազագույնը 3510 միլիգրամ կալիում ընդունել:

Որպես կանոն, մարդու սննդակարգում աղի ավելցուկ և կալիումի պակաս կա: Իսկ դա կարելի է լրացնել ավելի շատ սպառելով լոբազգիներ, ընկուզեղեն, ոլոռ, սպանախ, կաղամբ, բանան, պապայա և արմավ (խուրմա):

Իսկ աղ կա նույնիսկ կաթում և ձվում: Սակայն առավել մեծ քանակով աղ է պարունակում վերամշակված սննդամթերքը: Օրինակ՝ 100 գրամ բեկոնում, չիպսում, պոպկոռնում մոտ 1500 միլիգրամ աղ կա:

Հարցեր, պատասխաններ, մեկնաբանություններ