Ինչպե՞ս ճիշտ սնվել ամառային եղանակներին. մասնագետի խորհուրդներ

Ամռանը մարդու օրգանիզմը փոխվում է եւ հեղուկի անհրաժեշտությունը մեծանում է, ինչը ենթադրում է, որ միրգ-բանջարեղենի օգտագործումը պետք է ավելանա եւ նվազի մսային, կաթնային սննդամթերքի օգտագործումը: Այս մասին, այսօր` հուլիսի 26-ին, մամուլի ասուլիսում ասաց Առողջապահության նախարարության կուրորտաբանության եւ ֆիզիկական բժշկության գիտահետազոտական ինստիտուտի բժիշկ սննդաբան Վարդանուշ Պետրոսյանը` խոսելով այն մասին, թե ինչ ուտել ամռանը:

Նա խորհուրդ տվեց նաեւ խոզի, տավարի միսը փոխարինել ձկնային մսեղենով:

«Ամռանը Երեւանի նման տաք քաղաքում նախաճաշը պետք է լինի ժամը 9-10-ին, ճաշը մինչեւ ժամը 11-15-ը, իսկ ընթրիքը` ժամը 6-ից հետո»,-ասաց նա:

Ինչ վերաբերում է հեղուկին, ապա մասնագետը նշեց, որ եթե ոչ ամառային եղանակին խորհուրդ է տրվում խմել 2-2,5 լիտր հեղուկ, ապա ամռային եղանակին խորհուրդ է տրվում 3-3.5 լիտր, իսկ ճնշման հետ խնդիրներ ունեցողներին մինչեւ 1.5 լիտր հեղուկ, որի մեջ մտնում են նաեւ ապուրները:

Ի դեպ, Վարդանուշ Պետրոսյանը նաեւ նշեց, որ գազավորված ըմպելիքները, ոչ միայն քիմիական բաղադրիչներով են հագեցած, այլեւ չեն հագեցնում ծարավը, իսկ որպես օրինակ խորհուրդ տվեց ծարավ լինելու դեպքում մեկ բաժակ ջուր եւ գազավորված ըմպելիք խմել եւ այդ փորձի միջոցով ակնհայտ կդառնա, թե որ ըմպելիքն է ավելի շուտ հագեցնում: Նա խորհուրդ տվեց նաեւ ձմերուկի միջոցով շաբաթական առավելագույնը երկու անգամ բեռնաթափում իրականացնել:

Իսկ նիհարելու համար սովաբուժությամբ զբաղվող մարդկանց, մասնագետը խորհուրդ տվեց զերծ մնալ այդ քայլից, հակառակ դեպքում խորհուրդ տվեց միայն բժշկի վերահսկողության պայմաններում դիմել այդ քայլին:

Հարցեր, պատասխաններ, մեկնաբանություններ