Ամերիկացի գիտնականները հագեցվածության զգացում առաջացնող բաղադրիչ են հայտնաբերել

Հատուկ բաղադրիչը կարող է օգնել ավելորդ քաշի դեմ պայքարում, քանի որ առաջացնում է հագեցածության զգացում, հայտնաբերել են ամերիկացի գիտնականները: Այս մասին հայտնում է РИА Новости գործակալությունը` հղում անելով Ամերիկյան քիմիական կազմակերպության մամլո հաղորդագրությանը:

Խոսքը մեթիլցելյուլոզայի մասին է` մի սպիտակ փոշի, որը լուծվում է սառը ջրում, իսկ տաքացնելու դեպքում դառնում է գել և ժելատինի է նմանվում: Այս թանձրացուցիչը մեծապես օգտագործվում է սննդի արդյունաբերության մեջ, բայց երբեք չի օգտագործվել քաղցը հագեցնելու համար: «Այս բաղադրիչը կարող է մարդու մոտ հագեցվածության տպավորություն ստեղծել, եթե նույնիսկ նա քիչ քանակությամբ սնունդ է կերել, իսկ այդ դեպքում քաղցը կբավարարվի և մարդն ուտել չի ուզենա»,- պատմել է հետազոտության հեղինակներից մեկը` Քարսթեն Հյուեթերմանը:

Մեթիլցելյուլոզայի նորացված տարբերակն ընդունած կամավորները զգացել են քաղցի զգացումի նվազում: Հագեցածության զգացումը տևել է ամենաքիչը 2 ժամ:

Հետազոտողները կարծում են, որ այդ նյութը կարող է մտնել սառը ուտելիքների բաղադրության մեջ, օրինակ՝ յոգուրտների կամ զովացուցիչ ըմպելիքների:

Հարցեր, պատասխաններ, մեկնաբանություններ