Ավստրալացի գիտնականները վաղաժամ ծնունդների դեմ դեղ են ստեղծում. news.am

Ավստրալացի մասնագետներն աշխատում են նոր դեղի ստեղծման ուղղությամբ, որը կօգնի խուսափել վաղաժամ ծնունդներից: Մկների վրա կատարված հետազոտությունների ընթացքում դեղը բարձր արդյունավետություն է ցուցադրել: Դեղի ներգործուն նյութը նալոքսոնն է. ափիոնային ոչ թմրանյութային ցավազրկող, որն ընդունակ է հակազդելու մյուս ափիոնիդներին: Նալոքսոնը կարելի է ընդունել նաեւ հղիության ընթացքում:

Մկների վրա կատարված փորձերի շարքը ցույց է տվել, որ մասնագետների կողմից (+)-նալոքսոն կոչվող դեղը բակտերիալ ինֆեկցիայով վարակված մկների մոտ էականորեն նվազեցրել է վաղաժամ ծննդի հավանականությունը: Դրանից զատ, դեղն օգտակար է եղել նաւ մկնիկների համար, որոնց մայրերը հղիության ուշ շրջանում վարակվել են աղիքային ցուպիկով. համանման դեպքերում նորածինները սովորաբար անբավարար քաշ են ունենում, սակայն այս դեպքում այդպիսի բան տեղի չի ունեցել:

Հետազոտության ղեկավար պրոֆեսոր Սառա Ռոբերթսոնը հայտարարել է, որ (+)-նալոքսոնի կիրառմամբ բուժման շնորհիվ հետազոտվող մկների շրջանում բակտերիալ ինֆեկցիաներով հրահրված վաղաժամ ծնունդներ չեն եղել: Չեն եղել նաեւ մեռելածին կամ ծնվելուց կարճ ժամանակ անց մկնիկների մահվան դեպքեր, իսկ այն առանձնյակները, որոնք կարող էին չափազանց փոքր չափերով լույս աշխարհ գալ, (+)-նալոքսոնի շնրհիվ նորմալ են ծնվել:

Բորբոքումը հաճախ ծննդի գործընթացի վաղաժամ սկսվելու կատալիզատոր է: Օրգանիզմում բորբոքման մակարդակի բարձրացման կարող են հանգեցնել ախտածին բակտերիաները, սթրեսը կամ ընկերքին հասցված որեւէ վնասվածքը: Այդ ընթացքում TLR4 ռեցեպտորն է սկսում աշխատել, որն էլ գործարկում է այն գործընթացը, որը նորմալ պայմաններում շատ ավելի ուշ էր սկսվելու: Ադելաիդայի համալսարանի գիտնականների մշակած դեղը կասեցնում է այդ գործընթացը եւ, ինչպես ցույց են տվել կենդանիների վրա կատարված փորձերը, թույլ չի տալիս, որ ծնունդը ժամկետից վաղ սկսվի:

Հարցեր, պատասխաններ, մեկնաբանություններ