Սպերմատոզոիդը ձվաբջջին բռնում է փոքր հարպունի միջոցով. news.am

Բեղմնավորման ժամանակ սպերմատոզոիդը ձվաբջջին բռնում է մանր հարպունի օգնությամբ, որոնք առաջանում են սպեցիֆիկ սպիտակուցներից։ Այս մասին հայտարարել են ամերիկացի գիտնականները։

Վիրջինիայի համալսարանի բժշկագիտական դպրոցի մասնագետները մանրամասն ուսումնասիրել են սպերմատոզոիդի եւ ձվաբջջի միաձուլման գործընթացն ու նկատել, որ դրա համար սպերմատոզոիդներն օգտագործում են մանր հարպուններ, որոնք իրենցից ներկայացնում են նիզակի տեսք ունեցող սպիակուցներ։ Այս բացահայտման համար հետազոտողներին ամբողջ 14 տարի է անհրաժեշտ եղել։

Գիտնականներն իրենց ստացած արդյունքը որակել են որպես «ցնցող» եւ «հեղափոխական», քանի որ այդ տվյալները բեղմնավորման գործընթացը հասկանալու ճանապարհին կատարած մեծ քայլ են։

«Աքրոսոմում (սպերմատոզոիդի գլխիկի առաջնամասում գտնվող օրգանոիդ) մեծ քանակությամբ պարունակվող առանցքային սպիտակուցներից մեկը բյուրեղանում է եւ վերածվում թելիկների։ Այժմ մենք ենթադրում ենք, որ այդ թելիկները մասնակցում են ձվաբջջին միանալու գործընթացին»,- ասել է հետազոտության հեղինակ Ջոն Հերրը։

Տեսականորեն նոր բացահայտումը կարող է նպաստել անպտղության բուժման նոր մեթոդների բարելավմանը, կարծիք են հայտնել մասնագետները։

Հարցեր, պատասխաններ, մեկնաբանություններ