Բժիշկները ցողունային բջիջներից առաջին անգամ աճեցրել են լիարժեք լյարդ. 1in.am

Ամերիկացի կենսաբաններն առաջին անգամ կարողացել են լյարդի լիարժեք նմանօրինակ աճեցնել, որն ունակ է մաքրել արյունը տոքսիններից և կատարել այդ օրգանի մյուս գործառույթները՝ օգտագործելով ցողունային բջիջներ: Այս մասին ասվում է Stem Cells Translational Medicine ամսագրում հրապարակված հոդվածում:

Գիտնականներին հաջողվել է լյարդի փոքր նմանօրինակներ աճեցնել փորձանոթի մեջ և այն փոխպատվաստել առնետների ու մկների մարմնում: Նրանց մարմնում օրգանը «միացել է» արյունատար համակարգին և սկսել է արտադրել ալբումին՝ օրգանիզմի կարևորագույն սպիտակուցներից մեկը, որն արտադրում են լյարդի բջիջները: Բացի դրանից՝ «նորմալ» լյարդի վնասումը չի հանգեցրել կրծողների արագ մահվան, ինչը վկայում է, որ արհեստական լյարդը մաքրել է արյունը և կատարել այլ կրիտիկական գործառույթներ:

Գիտնականները կարծում են, որ այդպիսի օրգանոիդները հնարավոր է օգտագործել որպես ելքային նյութ լյարդի բջիջների արտադրության համար, որոնց միջոցով կարելի է «աճեցնել» հիվանդների վնասված լյարդը և այդպիսով վերականգնել դրա գործառույթը:

Հարցեր, պատասխաններ, մեկնաբանություններ