Բժիշկները մետաղական ստենտներից եւ մաշկից նոր կերակրափող են ստեղծել. news.am

Ամերիկացի բժիշկները երիտասարդի համար նոր կերակրափող են ստեղծել դոնորական մաշկի եւ մետաղական ստենտների օգնությամբ: Երբ 24 տարեկան տղամարդը յոթ տարի առաջ տեղի ունեցած ՃՏՊ-ի հետեւանքով անդամալույծ է դարձել, բժիշկները փորձել են վերականգնել նրա կերակրափողը: Նրանք փորձել են նոր օրգան ստեղծել` օգտագործելով հենց հիվանդի մարսողական համակարգի փողը, սակայն այդ փորձը ձախողվել է:

Բժիշկները որոշել են նոր տեխնիկա փորձարկել, որն ավելի վաղ փորձարկվել էր միայն շների վրա` ստենտների եւ մաշկի օգնությամբ կերակրափողի վերին հատվածի վերականգնման համար: Նման մեթոդն արդեն հավանության էր արժանացել ԱՄՆ-ի Սննդամթերքի եւ դեղերի վերահսկողության պետական հանձնաժողովի կողմից:

Ցյուրիխի համալսարանի վերականգնողական բժշկության ինստիտուտի տնօրեն  Սայմոն Հյորթսթրուպը նշում է, որ վիրահատությունը բացառիկ էր, որովհետեւ դրա արդյունքները ենթադրում են, որ մարդու օրգանիզմն ի վիճակի է որոշակի նոր օրգաններ աճեցնել հիմնական կառուցվածքի իմպլանտավորումից հետո:

Բժիշկներն էնդոսկոպիկ փողը ստամոքսով դեպի վեր են տարել` դեպի կերակրափողի մնացած մասը, որպեսզի մետաղական երեք ստենտ տեղադրեն կերակրափողի կառուցվածքի վերականգնման համար, ինչից հետո դրանք ծածկել են հենց հիվանդի մաշկով:  Հետո մաշկը ծածկվել է գելով, որը կազմված էր հիվանդի արյունից եւ ցողունային բջիջներին ձգելու որոշակի հատկություններ ուներ:

Չնայած բժիշկներն որոշել էին ստենտները հեռացնել վիրահատությունից երեք ամիս անց, հիվանդը դրանից հրաժարվել է` վախենալով, թե կկորցնի ինքնուրույն ուտելու եւ խմելու նորից ձեռք բերված կարողությունը: Վերջերս` վիրաբուժական հաջող միջամտությունից չորս տարի անց, ստենտներն արդեն հեռացրել են, իսկ բժիշկները հաստատել են, որ  կերակրափողի բոլոր հինգ շերտերը վերջնականապես վերականգնվել են եւ կերակրափողը գործնականում նույնական է բնականին: Հետազոտության արդյունքները հրապարակվել են Lancet ամսագրում:

Հարցեր, պատասխաններ, մեկնաբանություններ