Նոր ոչ միջամտողական մեթոդը կօգնի ախտորոշել լյարդի քաղցկեղը զարգացման վաղ փուլում. news.am

Ջորջիայի համալսարանի ամերիկյան գիտնականները մշակել են վիզուալիզացիայի նոր մեթոդ, որը կօգնի ախտորոշել լյարդի քաղցկեղը եւ այլ հիվանդություններ շատ ավելի վաղ, քան գոյություն ունեցող մնացած մեթոդները:

Լյարդի քաղցկեղը հայտնի է մահացության բարձր ցուցանիշներով եւ դժվարությամբ է բուժվում, քանի որ հիմնականում ախտորոշվում է բավականին ուշ: Խնդիրն այն է, որ տվյալ պահին գոյություն չունի քաղցկեղի այս տեսակի եւ մետաստատզների վաղ ախտորոշման որեւէ մեթոդ, եթե գոյացությունները մեկ սանտիմետրից փոքր են: Նոր մեթոդը, սակայն, թույլ կտա ախտորոշել լյարդի քաղցկեղը, նույնիսկ, եթե այն 0.25 մմ-ից փոքր է:

Մագնիսա-ռեզոնանսային տոմոգրաֆիան այսօր վիզուալիզացիայի՝ ճառագայթում չենթադրող առաջատար մեթոդն է հիվանդությունների ախտորոշման ժամանակ, սակայն այն այնքան էլ արդյունավետ չէ վաղ ախտորոշման համար, քանի դեռ կոնտրաստային նյութերը շատ արագ են դուրս բերվում լյարդից, ինչը բավարար ժամանակ չի տրամադրում որակյալ վիզուալիզացիա ստանալու համար: Նորագոյացությունների ավելի արդյունավետ հայտնաբերման համար հետազոտողները կոնտրաստային նյութերի նոր տեսակ են  մշակել, որոնց հիմքում սպիտակուցն է, մշակվել են նաեւ պատկերի ձեւավորման նոր սկզբունքները, ինչը կարող է ապահովել լյարդի քաղցկեղի եւ այլ հիվանդությունների ախտորոշման արդյունավետությունը:

Ինչպես բացատրեց վերոնշյալ համալսարանի պրոֆեսոր Ջենի Յանգը՝ հետազոտության հեղինակներից մեկը,  նոր նյութերը թույլ են տալիս կոնտրաստ պատկերներ ստանալ մեկ սեանսի ընթացքում եւ ապահովում են քաղցկեղային հիվանդությունների ախտորոշման ճշգրտությունը:

Հարցեր, պատասխաններ, մեկնաբանություններ