Բժիշկները հայտնել են գլխի փոխպատվաստման առաջին վիրահատությունը կատարելու պատրաստակամության մասին. tert.am

Վիրաբույժների միջազգային թիմը բարեհաջող ավարտել է նախնական փորձարկումների փուլն ու պատրաստակամություն հայտնել մարդու գլխի փոխպատվաստման վիրահատություն իրականացնել: Ինչպես նշում է vz.ru-ն, այդ մասին հայտնել են իտալացի Սերջիո Կանավերոն և նրա չինացի գործընկեր Ժեն Սյաոտինը: Վերջիններս պատրաստ են վիրահատել ռուս ծրագրավորող Վալերի Սպիրիդոնովին, ով տառապում է  հազվագյուտ գենետիկ հիվանդությամբ։ Դրա հետևանքով տղամարդը տարեցտարի ավելի է դժվարանում սեփական մարմինը կառավարելու հարցում։

Սպիրիդոնովի վիճակն այնքան բարդ է, որ նա համաձայն է գլխի փոխպատվաստման վիրահատությանը` գիտակցելով դրա մահացու վտանգը:

Մասնագետները մանրամասնել են, որ կենդանիների վրա անցկացված փորձարկումները հաջող ավարտ են ունեցել ու տվել են սպասված արդյունքներ: Նրանք հավելել են, որ կրկնակի փորձարկումների կարիք չկա:

Նրանց խոսքերով՝ վիրահատությունը, որն իրականացվելու է Ռուսաստանում, իսկական հեղափոխություն է լինելու բժշկության ոլորտում: Մասնագետների համաձայն՝ այս վիրահատությունը կարժենա 20 մլն դոլար:

Կանավերոն մանրամասնել է, որ 36 ժամ տևող վիրահատությունն իրականացվելու է ռուս բժիշկների հետ համատեղ: Իտալացու խոսքով, որպեսզի այդ ընթացքում հյուսվածքները չքայքայվեն, հիվանդի գլուխն ու մարմինը սառեցվելու են։

Աղբյուրը մանրամասնում է, որ այս վիրահատությանը դեմ է հանդես եկել քրիստոնեական եկեղեցին։

Հարցեր, պատասխաններ, մեկնաբանություններ