ՀՀ ԱՆ. 2024 թվականին «STENT FOR LIFE» ծրագրով մատուցվել է 2682 ծառայություն

«Stent for Life» կյանք փրկող ծրագիրը, ամբողջ բնակչությանը` անկախ սոցիալական կարգավիճակից և տարիքից, պետական պատվերի շրջանակներում` անվճար իրականացվում է սահմանված կլինիկական չափանիշների առկայության դեպքում:

Սրտի անհետաձգելի վիրահատությունների կազմակերպումն իրականացվում է իշեմիայի ախտանիշների կլինիկական դրսևորումից 12 ժամվա ընթացքում` ներառյալ ախտորոշումը ճշտելու և պացիենտին բժշկական հաստատություն տեղափոխելու ժամանակահատվածը:

Ծրագրի շրջանակներում սրտամկանի սուր ինֆարկտի դեպքում ապահովվում է դեղապատ ստենտի տեղադրում` անվճար, իսկ աորտա-կորոնար շունտավորումը` արտոնյալ պայմաններով:

Նշենք, որ ծրագրի շահառու լինելը պայմանավորված է սահմանված չափանիշներին համապատասխանությամբ ` անկախ տեղափոխման եղանակից` շտապօգնության ծառայության միջոցով, թե սեփական նախաձեռնությամբ:

Ծրագիրն անվճար իրականացվում է կլինիկական հետևյալ չափանիշների դեպքում`

• «Սրտամկանի սուր ինֆարկտ ST էլևացիա» ախտորոշում
• «Սրտամկանի սուր ինֆարկտ առանց ST-էլևացիայի» ախտորոշում, երբ առկա է տրոպոնինի > 1000նգ/լ ցուցանիշ և սրտամկանի ինֆարկտ-պատասխանատու գոտևորող կորոնար զարկերակի կամ նրա մարգինալ ճյուղերից մեկի թրոմբոզ կամ նշանակալի անկայուն նեղացում
• Կարդիոգեն շոկով բարդացած սրտամկանի սուր ինֆարկտ:

«Սրտի անհետաձգելի վիրահատություններ» (Stent for Life) ծրագիրը իրականացվում է հետևյալ բժշկական կազմակերպություններում`

• Գորիսի Ֆրանս-Հայկական սրտանոթային կենտրոն,
• Վանաձորի բժշկական կենտրոն,
• Գյումրու բժշկական կենտրոն,
• «Աստղիկ» բժշկական կենտրոն,
• «Արամյանց» բժշկական կենտրոն,
• «Սուրբ Գրիգոր Լուսավորիչ» բժշկական կենտրոն,
• «Երևան» բժշկագիտական կենտրոն,
• «Նորք Մարաշ» բժշկական կենտրոն,
• «Էրեբունի» բժշկական կենտրոն,
• «Բեսթ Լայֆ» բժշկական կենտրոն,
• «Շենգավիթ» բժշկական կենտրոն,  
• «Հերացի թիվ 1» հիվանդանոցային համալիր,
• «Արմենիա» հանրապետական բժշկական կենտրոն:

Հարցեր, պատասխաններ, մեկնաբանություններ