Բրադիկարդիան չի բարձրացնում սրտի հիվանդությունների զարգացման ռիսկը. news.am

Բրադիկարդիան (առիթմիայի տարատեսակ, որի դեպքում սրտի կծկումների հաճախությունը րոպեում 60 հարվածից պակաս է) չի ավելացնում սրտի հիվանդությունների զարգացման ռիսկը, եթե հիվանդն այլ ախտանիշներ կամ ռիսկի գործոններ չունի: Այդ մասին տեղեկացնում են Wake Forest Baptist Hospital-ի գիտնականները:

Բժիշկ Աջայ Դարոդն ու իր գործընկերները վերլուծել են 6733 մարդու մասին տվյալներ, որոնք հավաքվել էին 2000-ից 2002-ի ընթացքում: Հետազոտության մասնակիցներին հետեւել են տասը տարվա ընթացքում: Հետազոտության սկզբում նրանք բոլորը 45- 84 տարեկան էին եւ նրանցից ոչ-ոք չէր տառապում որեւէ սիրտ-անոթային հիվանդությամբ:

Հեղինակները պարզել են, որ բրադիկարդիայով տառապող մարդկանց մոտ, որոնց սրտային կծկումների հաճախությունը չէր գերազանցում րոպեում 50 հարվածը (ինչը րոպեում 10-50 հարվածով պակաս է նորմայից), սրտի հետ կապված խնդիրների զարգացման ռիսկը չի մեծացել: Այս խմբում մահացության մակարդակը ճիշտ այնպիսին էր, ինչպիսին այն մարդկանց մոտ, որոնց սրտի խփոցները նորմայի սահմաններում էին: 

Ավելին, հետազոտությունը նաեւ ցույց է տվել, որ բրադիկարդիա ունեցող 902 մասնակիցների մոտ, ովքեր սրտի ռիթմի կարգավորման դեղեր են ընդունել, սիրտ-անոթային հիվանդությունների ի հայտ գալու հավանականությունը ճիշտ այնպիսին էր, ինչպիսին նրանց մոտ էր, ովքեր նման դեղեր չէին ընդունել: Գիտնականները նաեւ նկատել են, որ նման հիվանդների մահացության հավանականությունն ավելի բարձր էր, քան դեղեր չօգտագործած հիվանդներինը:

Այդ հետազոտության մասին տեղեկացնում է JAMA Internal Medicine-ը:

Հարցեր, պատասխաններ, մեկնաբանություններ