Արեգակնային համակարգում փոփոխությունները կարող են հանգեցնել սրտի կաթվածների. սրտաբան

Այսօր լրագրողների հետ հանդիպման ժամանակ սրտաբան Տիգրան Պողոսյանը հայտնեց. «Արեգակնային համակարգում փոփոխություններն, իհարկե, թողնում են ազդեցություն առողջության վրա: Ցանկացած մարդ այդ ժամանակ ենթարկվում է փոփոխությունների: Առողջական համակարգից ամենախոցելին սիրտ-անոթային համակարգն է: Կան մի շարք հետազոտություններ, նաև եղել են կենտրոններ, որոնք իրենք էլ չափել են, թե ինչքան է արեգակնային ակտիվությունը և դրանից ելնելով, կատարել են եզրակացություն հիվանդների մոտ և նոր համապատասխան դեղորայք նշանակել: 

Սիրտ-անոթային հիվանդությունները մահացության առումով առաջին տեղն են զբաղեցնում, այդ պատճառով հատկապես այդ համակարգում բողոքներ ունեցող մարդկանց է խորհուրդ տրվում ուշադիր լինել: Այդ շրջանում հիմնականում աճում է կաթվածների, սրտի առիթմիաների հաճախականությունը: Դրանից ելնելով պետք է ավելի ուշադիր լինել, այսինքն` եթե կան մարդիկ, որոնք գիտեն իրենց հիվանդության մասին, երբ հաղորդվում է բռնկումների մասին (դա հասնում է 40-50 ժամ հետո), այդ հիվանդները պետք է կապվեն իրենց բժիշկների հետ, որպեսզի նրանք էլ դեղորայքային որոշ փոփոխություններ կատարեն: Ապացուցված է, որ արեգակնային բռնկումների ժամանակ լինում է դեղորայքի փոփոխություն, այսինքն` իրենց համապատասխան դոզան բավարար չի լինում, և դոզայի փոփոխության կարիք է լինում: 

Նշեմ նաև, որ մենք` հայերս, համարվում ենք գեոմագնիսական լիաբիլ ազգ, այսինքն` խոցելի ենք նմանատիպ երևույթների ժամանակ: Գիտնականները կատարել են նաև որոշակի հետազոտություններ, որոնցով պարզել են թե հատկապես որ տարեթվերին ծնված մարդիկ են խոցելի և զգայուն արեգակնային համակարգում փոփոխությունների ժամանակ: Դրանք են՝ 1953, 1954, 1963 , 1965, 1974, 1975, 1985, 1986 և 1995, 2001 և 2002 թվականին ծնվածները:

Ասուլիսի մյուս բանախոսը՝ Ալիխանյանի անվան գիտական լաբորատորիայի ուսանող Հասմիկ Ռոստոմյանը, նշեց, որ արևն այժմ ակտիվ վիճակում է գտնվում. «Գոյություն ունեն ցիկլեր, որի ընթացքում արևը հանգած վիճակից դառնում է ակտիվ և նորից հանգում: Ցիկլը տևում է միջինը 11 տարի: Արևային բծերը արևի սկավառակի վրա վիզուալ սև կետիկներ են, դրանք արևի հետ համեմատած ունեն շատ ցածր ջերմաստիճան և նրանց մագնիսական դաշտը շատ ուժեղ է: Արևագծերում տեղի են ունենում բռնկումներ և որքան մագնիսական դաշտն ավելի ուժեղ է, այնքան բռնկումն ավելի ուժեղ է: Երբ բռնկումը լինում է ուժեղ, հնարավոր է բռնկումից հետո արևի որոշ մասը պոկվի և սկսի երթևեկել: Այն տիեզերքով երթևեկելով կարող է հասնել մոլորակներին, նաև Երկրին: Երկրին հասնելու ժամանակ տեղի է ունենում գեոմագնիսական փոթորիկ: Բռնկումների ուժեղ լինելու դեպքում նաև Երկրի վրա ազդեցությունն է ուժեղանում:

Այդ պոկված ամպն ունի մեծ արագություն, որը հասնում է մոտ 100 կմ/վրկ-ի: Կարող է վնասվել նաև ռադիո և բջջային կապը: Այն իր ազդեցությունն է թողնում նաև թռչունների և ձկների վրա: Նրանք, երբ տաք տեղից գնում են ցուրտ տեղ, երկրի մագնիսական դաշտի լարվածության գծերով են գնում, և եթե մագնիսական դաշտի գիծը փոխվում է, այդ ժամանակ ուժագծերն են փոխվում: Հետևաբար` թռչունները սխալ են թռչում և ձկները` սխալ լողում: 

Ամենաուժեղ մագնիսական փոթորիկը, որ երբևիցե տեղի է ունեցել, 1859թ. սեպտեմբերին էր, երբ արևի վրա բծերը այնքան մեծ են եղել, որ երկրից միանգամից երևացել են: Երբ արևի վրա բռնկում է եղել, 18 ժամ հետո հասել է երկիր: Այդ ժամանակ տելեգրաֆներ կային, երբ դրանց ամբողջական համակարգն անջատվել է: Այդ ժամանակ փոթորիկն այնքան ուժեղ է եղել, որ աշխարհի բոլոր երկրներում է նկատվել, դրա պես երկրորդը չի եղել: Կարծում եմ` վախենալ պետք չի, որովհետև Երկրի հետ ոչ մի լուրջ բան չի եղել: Նշեմ նաև, որ կան բազմաթիվ սարքեր, որոնք ուսումնասիրում են արևը: Այդպիսի սարքեր կան նաև Հայաստանում՝ Արագած լեռան վրա և Ամբերդում»: 

Հարցեր, պատասխաններ, մեկնաբանություններ