«Պետք է առաջին հերթին ապահովագրեին ոչ թե ավտոմեքենաները, այլ մարդկանց կյանքը». Շահեն Խաչատրյան

Առողջապահության ոլորտը կանոնակարգման կարիք ունի, և այստեղ պետք է մեծ դերակատարություն ունենա պետությունը: Այս մասին լրագրողների հետ հանդիպման ժամանակ ասաց սրտաբան Շահեն Խաչատրյանը:

Նրա խոսքերով՝ Հայաստանում սնկի պես աճել են սրտաբանական կենտրոնները, որոնք հագեցած են ժամանակակից սարքավորումներով, սակայն չունեն համապատասխան մասնագետներ: Սրտաբանը նաև նշեց, որ օրինակ՝ Հայաստանում կատարվում է սրտի ստենդավորում, բայց սրտի միջամտային վիրաբույժ, որը կատարում է այդ գործողությունը, գրանցված չէ։ Ստացվում է այնպես, որ Հայաստանում նման մասնագետ չկա, բայց նման միջամտություն կատարվում է: «Մեր երկրում բժիշկներն ըստ հայեցողության են բուժում»,- ասաց Շ. Խաչատրյանը, հավելելով, որ դա անթույլատրելի է։

Ըստ նրա՝ հասարակությունը պետք է բժշկության ոլորտում պահանջի օրինական դաշտ։ Մարդիկ իրենց բուժման ժամանակ շատ դեպքերում կասկածներ են ունենում, թե ինչ՞ու են իրենց այդ կերպ բուժում և ոչ թե այնպես, ինչպես ամբողջ աշխարհում է ընդունված։ Օրինակ, նա նշեց, որ Հայաստանում, տզրուկաբուժությամբ քաղցկեղ են բուժում ու դա արտոնագրված է: «Բժշկությունը պետք է հիմնված լինի միջազգային փորձի վրա, մարդիկ պետք է վստահ լինեն, որ իրենց ճիշտ են բուժում, որ իրենց ճիշտ դեղեր են տալիս»,- ասաց սրտաբանը:

Ի դեպ, Շ.Խաչատրյանը նշեց, որ պետք է առաջին հերթին ապահովագրեին ոչ թե ավտոմեքենաները, այլ մարդկանց կյանքը։ «Վիրահատությունը շատ թանկ է։ Մարդը գումար չունի։ Բժիշկը կարող է իր աշխատանքը նվիրել նրան, բայց ոչ դեղորայքն ու անհրաժեշտ նյութերը: Ու ստացվում է, որ մարդը դատապարտված է»,- նշեց նա:

Հարցեր, պատասխաններ, մեկնաբանություններ