Կլինիկական դեպք: Բազկոսկրի հսկա անևրիզմալ կիստա. ներկայացնում է Արա Այվազյանը. armeniamedicalcenter.am

«Արմենիա» բժշկական կենտրոնում մանկական օրթոպեդ-վնասվածքաբան, բ. գ. դ., պրոֆեսոր Արա Այվազյանի կողմից կատարվել է հերթական՝ իր բնույթով բացառիկ վիրահատությունը:

«Արմենիա» ՀԲԿ ընդունարան էին դիմել ծնողները. երեխայի մոտ առկա էր անևրիզմալ կիստա, որը գրավում էր բազկոսկրի ավելի քան 2/3 հատվածը: Կիստայի պատճառով հիվանդի մոտ առաջացել էին բազմաթիվ ախտաբանական կոտրվածքներ:

Որոշում է կայացվել կատարել ուռուցքի ներօջախային ռեզեկցիա. առկա հսկայական դեֆեկտը փոխարինվել է աուտո-ոսկրանյութի և տրիկալցիֆոսֆատի խառնուրդով: Հաշվի առնելով կոտրվածքների առկայությունը, կատարվել է նաև օստեոսինթեզ՝ ինտրամեդուլյար էլաստիկ տիտանային մեխերի օգնությամբ:

Վիրահատությունից հետո հիվանդն ապաքինվում է, ուռուցքի կրկնություն (ռեցիդիվ) չկա: Կոտրվածքները լավացել են, իսկ պատվաստանյութը փոխարինվում է առողջ ոսկրանյութով: Այժմ ամեն ինչ ընթանում է բնականոն՝ վերջույթի գործառույթը վերականգնվել է, երեխան վերադարձել է իր ամենօրյա ակտիվությանը:

Ո՞րն էր վիրահատության բացառիկությունը:

Նման բացառիկ ծավալով գոյացություններ հազվադեպ են հանդիպում: Փաստորեն, մեկ վերջույթում առկա էին նախ՝ շատ մեծ չափերի գոյացություն և հինգից ավելի կոտրվածքներ` տարբեր մակարդակներում:

Այդպիսի դեպքերում, սովորաբար, սպասում են կոտրվածքի-կոտրվածքների լավանալուն, հետո միայն դիմում վիրահատական միջամտության: Բացի այդ, կլինիկական դեպքը բարդ էր նրանով, որ այդ տարիքի երեխաների մոտ բավարար քանակությամբ աուտոոսկրանյութ չի լինում:

Հարցեր, պատասխաններ, մեկնաբանություններ