Հնդկաստանում առաջին անգամ փոխպատվաստել են հիվանդի երկու ձեռքերը. 1in.am

Հնդկաստանում վիրաբույժները մի հիվանդի միանգամից երկու ձեռքի փոխպատվաստման՝ երկրում առաջին վիրահատությունն են արել: Վիրահատությունը մոտ 16 ժամ է տևել: Արդյունքում՝ երկու վերջույթները հաջողությամբ փոխպատվաստվել են 30-ամյա Մանու անունով տղամարդուն, որը ձեռքերից զրկվել էր 3 տարի առաջ, երբ դուրս էր նետվել շարժվող գնացքից: Այս մասին հայտնում է The Independent-ը:

Business Standard-ը հայտնում է, որ վիրահատությունն արվել է հունվարի 12-ին: Այն իրականացրել է բժիշկների խումբը Կոչի քաղաքի Ամրիթա բժշկական գիտությունների ինստիտուտից: Վիրահատությանը մասնակցել է 20 բժիշկ:

«Մանուն կարողանում է շարժել ձեռքերը, քանի որ նրա նախաբազկի մկաններն աշխատում են մատները շարժելու համար»,- ասում է վիրահատությունը ղեկավարած ինստիտուտի պլաստիկ վիրաբուժության բաժանմունքի ղեկավար պրոֆեսոր Սուբրամանիա Այերը: Մանուն պետք է ֆիզիոթերապիայի կուրս անցնի, հայտնում է New India Express-ը: Բացի դրանից՝ նա ամբողջ կյանքում ստիպված կլինի իմունոդեպրեսանտներ ընդունել:

Վիրահատությունից հետո Մանուն շնորհակալություն է հայտնել բժիշկներին ներդրած ջանքերի համար: Նա ասել է, որ «հիացած է» իր նոր ձեռքերով: «Ես շատ երջանիկ եմ: Երբ կորցրի ձեռքերս, շատ վախեցած էի: Բայց հիմա ուրախ եմ, որ ինձ վիրահատեցին, և ես կարող եմ անել ամենը, ինչ անում էի իմ սովորական կյանքում»,- ասել է նա:

Մանուն նաև շնորհակալություն է հայտնել իր դոնորի ընտանիքին՝ 24-ամյա տղամարդու, ով զոհվել է մոտոցիկլով վթարի հետևանքով:

Աշխարհում երկու ձեռքի փոխպատվաստման առաջին վիրահատությունն արվել է 1998 թ. Ֆրանսիայում: Ճիշտ է, 3 տարի անց բժիշկները ստիպված նորից հեռացրել են վերջույթը հենց հիվանդի խնդրանքով, որն այդպես էլ չի կարողացել հարմարվել դրա հետ:

Հարցեր, պատասխաններ, մեկնաբանություններ