Ձեռքի մատների պրոթեզներ, որոնք երբեք բնականից չեք տարբերի. med.news.am

Այս նկարին նայելով՝ անմիջապես կմտածեք, թե նորմալ ձեռք եք տեսնում: Սակայն, եթե ուշադիր լինեք, ինքներդ կարող եք համոզվել, բութ մատի փոխարեն սիլիկոնե պրոթեզ է պատկերված:

Բայց ինչպե՞ս եւ ո՞ւմ է հաջողվել արվեստի նման գործ ստանալ:

Պարզվում է՝ կախված մատի չափսերից, աշխատանքի որակի եւ պատվերի ժամկետից՝ ինքներդ էլ կարող եք ձեռքի մատների որակյալ պրոթեզ ունենալ: Դիզայներներ Ալեքս Ստամոսի եւ Քրիստոֆ Բրաունի նախաձեռնությամբ Գերմանիաի Դրեզդեն քաղաքում հիմնադրված Stamos and Braun Prosthesenwerk ընկերության աշխատակիցներն ուշադիր կզննեն ձեր պատվերը եւ անհատական արտադրանքի՝ ձեռքի, մատի, ոտքի, ոտնաթաթի եւ ոտքի մատի պրոթեզի դիմաց ընդամենը 1460-5000 ֆունտ ստեռլինգին համարժեք գումար կպահանջեն, հաղորդում է The Daily Mail-ը:

Դիզայներները նշում են, որ հին եւ տգեղ պրոթեզները բարձր վարպետության, հաճախորդին հարմար վերջույթներով փոխարինելու գաղափարն ի սկզբանե մեծ ոգեւորություն է պատճառել իրենց:

«Ցանկանում էինք դրական զգացողություններ, ինչո՞ւ չէ՝ երջանկություն պարգեւել մեր հաճախորդներին, որպեսզի մոռանան, որ ինչ-որ բան են կորցրել», - նշում են նրանք՝ հավելելով, որ յուրաքանչյուր հաճախորդի անհատական մոտեցում է ցուցաբերվում՝ համոզվելու համար, որ պրոթեզը թե՛ գույնով, եւ թե՛ ձեւով հարմար է մարմնին:

Ի դեպ, միջին բարդության բութ մատի պրոթեզ պատրաստելու համար նրանցից ընդամենը երկու օր է պահանջվում: Սակայն, երբ խոսքն ամբողջ ոտքի կամ ձեռքի մասին է՝ պատվերը կարող են մեկ շաբաթվա ընթացքում կատարել:

Հետաքրքրական է այն, որ եղունգներ պատրաստելիս ընկերության հիմնադիրներն ակրիլ են օգտագործում. սա հենց այն նյութն է, որի միջոցով գեղեցկության սրահներում կարող եք ձեր բնական եղունգները երկարացնել:

Այդուհանդերձ, դիզայներների արտադրանքը չի կարող բիոնիկ պրոթեզների հետ մրցել, քանի որ միայն արտաքինից է բնականին նման: Թեեւ, որոշ դեպքերում, այս կամ այն գործիքով նվագող երաժիշտներն անգամ կարող են դրանք կրել:

Հարցեր, պատասխաններ, մեկնաբանություններ