Բարձրակրունկ կոշիկները հարթաթաթություն են առաջացնում

Բարձրակրունկ կոշիկների հանդեպ սերն է պատճառը, որ կանանց մոտ հարթաթաթությունն ավելի հաճախ է հանդիպում, քան տղամարդկանց մոտ, պարզել են Արևելյան Անգլիայի համալսարանի գիտնականները:

Հարթաթաթությունը զարգանում է, երբ ջիլերը թուլանում են որոշակի էնզիմների ազդեցության տակ: Արդյունքում, ոտնաթաթի կամարն իջնում է` առաջացնելով ցավեր և դժվարացնելով ոտնաթաթի շարժումը:

doctors.am-ի փոխանցմամբ՝ գիտնականները կարծում են, որ, ազդելով էնզիմների վրա, կարելի է կանխել հարթաթաթության զարգացումը, որը սովորաբար գրանցվում է 40 անց տարիքի կանանց մոտ: Բժիշկ Գրեհեմ Ռայլին համոզված է, որ հենց բարձրակրունկ կոշիկներն են պատճառը, որ ոտքը ճիշտ դիրքով չի մնում, ինչի արդյունքում էլ ջիլերը թուլանում են:

Անդադար բարձրակրունկ կոշիկներ կրելը հանգեցնում է կոնքազդրային հոդի ու ծնկների լարմանը, ինչը մեծացնում է օստեոարթրիտի, մեջքի հետ խնդիրների և ոտնաթաթի մատների պաթոլոգիաների զարգացման հավանականությունը:

Ռայլիի խոսքերով` մոտ ժամանակներս հարթաթաթության դեմ դեղամիջոց դեռ չի արտադրվի: Այդ իսկ պատճառով ավելի նպատակահարմար կլինի հրաժարվել բարձր կրունկներից:

Հարցեր, պատասխաններ, մեկնաբանություններ