Հակաբակտերիալ ծածկույթով ատամի իմպլանտներն ինքնուրուն կսերտաճեն ոսկրին. news.am

University of the Basque Country-ի (Իսպանիա) գիտնականները զբաղված են իմպլանտների համար նոր ծածկույթների մշակմամբ, որոնք կպայքարեն բակտերիալ վարակների դեմ (որոնք կարող են իմպլանտների անջատման հանգեցնել) եւ դրանով իսկ նպաստել իմպլանտների շուրջ ոսկրային հյուսվածքի ձեւավորմանը: Ներկայում նրանք ստեղծել են երեք նոր ծածկույթ, որոնցից մեկն արտոնագիր ստանալու փուլում է:

Գիտական խմբի ղեկավար Բեաթրիս Փալլան ասել է, որ 10% դեպքերում ստիպված են լինում ատամի պրոթեզները հեռացնել վարակների կամ օստեոինտեգրման գործընթացում խանգարումների պատճառով: Խնդիրը լուծելու համար անհրաժեշտ էր նոր ծածկույթ մշակել, որը կնպաստեր ծնոտին իմպլանտի սերտաճմանը, նաեւ օժտված լիներ հակաբակտերիալ հատկություններով՝ հաշվի առնելով, որ բակտերիաները ծածկույթների նկատմամբ աստիճանաբար կայունություն են ձեռք բերում:

Նախկինում գիտնականներն արդեն այդպիսի ծածկույթներ ստեղծել են, որոնք օգնել են իմպլանտի կողքի ոսկրերին աճել եւ պրոթեզն ամրացնել, հաջորդ քայլով դրանք պետք է անհրաժեշտ հատկություններով օժտեին, որոնց շնորհիվ կկարողանային պայքարել վարակների դեմ:

Խնդիրը լուծելու համար գիտնականներն օգտագործել են զոլ-գել սինթեզի մեթոդը, որի դեպքում, նախ, կոլոիդային հեղուկ է առաջանում, ինչի մեջ առկա են հիդրօքսիդների (զոլ) մասնիկներ, հետո այդ լուծույթը գելի են վերածում: Այս գործընթացում պրեկուրսորը կրեմնիումն է, որը հայտնի է իր օստեոինդուկցիոն հատկությամբ (իր շուրջը ոսկրի աճ առաջացնելու հատկություն): Վերջին փուլում մասնագետները գելին տարբեր հակաբակտերիալ ագենտներ են ավելացրել՝ արդյունքում ստանալով երեք տարբեր ծածկույթ: Դրանցից մեկը վարակների կանխարգելման համար է, այսինքն՝ այնպիսի նյութից է ստեղծվել, որը տարալուծվում է` երկար ժամանակի ընթացքում՝ հակաբակտերիալ նյութն աստիճանաբար ազատելով: Մեկ այլ ծածկույթ` ստեղծված վարակի բուժման նպատակով, արագ քայքայվող նյութից է: Վերջին ծածկույթը, որի համար գիտնականները ներկայում արտոնագիր են ստանալու, նախատեսված է ատամնաբուժական կլինիկայում կիրառելու համար՝ դրանով ծածկում են իմպլանտի մի մասը, որտեղ վարակ է նկատվել, սակայն այդ դեպքում իմպլանտը հանելու անհրաժեշտություն չկա:

Նոր իմպլանտները դեռեւս պատրաստ չեն կլինիկական պրակտիկայում օգտագործելուն, նույնիսկ դրանց կլինիկական փորձարկումները չեն սկսվել, եւ դժվար է ասել, թե շուկայում երբ կհայտնվեն:

Հարցեր, պատասխաններ, մեկնաբանություններ