3D բիոփրինթերով հնարավոր կլինի իսկական ատամներ տպագրել. news.am

Ավստրալիայի Griffith University-ի գիտնականները ծրագրում են 3D բիոփրինթերով իսկական ատամներ ու ոսկրեր տպագրել: Այս ոլորտում եռամյա հետազոտություն անցկացնելու համար գիտնականները 650 000 դոլարի չափով դրամաշնորհ են ստացել:

Սասո Իվանովսկին ու նրա գործընկերները վերոնշյալ համալսարանից բացատրում են, որ եռաչափ բիոփրինթերի օգնությամբ իրենք կկարողանան ատամներ պատրաստել, որոնք կատարյալ կհամապատասխանեն հիվանդին: Դրա համար նրանք առաջին հերթին պետք է սկանավորեն հիվանդի ծնոտն ու ստեղծեն ատամի համապատասխան մոդելը:

Տպագրության համար օգտագործվելու են մարդկային բջիջներ, ինչը թույլ կտա ստեղծել ատամը՝ լնդի հյուսվածքների կտորով կամ, նույնիսկ, ծնոտի պակասող մասով: Դրանք տպագրվելու են հատուկ ջերմաստիճանում, որի ժամանակ կենդանի բջիջները չեն քայքայվում: Բիոփրինթերով տպագրված ատամի արտաքին տեսքը կախված է լինելու հենց հիվանդի պահանջներից, նրա ծնոտի կառուցվածքից ու ատամը կորցնելու պատճառից:

Հեղինակները նշում են, որ եթե ատամը կորել է վնասվածքի հետեւանքով, որպես կանոն, պահանջվում է նաեւ ծնոտի մի մասի վերականգնում եւ բիոտպագրությունը թույլ է տալիս նաեւ կատարել դա: Ներկայում, սովորաբար, օգտագործում են ոսկրային կտորներ, որոնք հանվում են հիվանդի կոնքից կամ ծնոտից, ինչը նաև ցավոտ է, բացի այդ, մարդու մարմնում այդքան էլ շատ չեն այն ոսկրերը, որոնք կարելի է օգտագործել նման բուժակարգի համար:

Հեղինակները ծրագրում են արդեն մոտ ժամանակներս՝ մեկ կամ երկու տարի հետո, նոր տեխնոլոգիաները մարդկանց վրա փորձարկել:

Հարցեր, պատասխաններ, մեկնաբանություններ