Գիտնականները բացահայտել են շիզոֆրենիայի առաջացման մեխանիզմը. news.am

Դյուկի համալսարանի ֆիզիոլոգները մկների վրա իրականացվող փորձարկումների ընթացքում ունիվերսալ մոլեկուլյար մեխանիզմ են բացահայտել, որը շիզոֆրենիա առաջացնող երեք տեսակի նյարդային փոփոխությունների պատճառ են դառնում

Գոյություն ունեն անոմալիաների երեք խումբ, որոնք ընկած են շիզոֆրենիայի ծագումը բացահայտող տեսությունների հիմքում: Առաջին տեսության հիմքում ուղեղի կառուցվածքային փոփոխություններ են՝ մոխրագույն նյութի դեգրադացիան եւ նյարդային կապերի քանակի նվազումը (պարզ չէ՝ այս երեւույթները շիզոֆրենիայի հետեւանք են, թե` պատճառ): Երկրորդ խմբի տեսությունները հիմնվում են  հիպոկամպում, ինչպես նաեւ ուղեղի այլ հատվածներում նեյրոնների՝ ոչնչով չպայմանավորված ակտիվության վրա: Երրորդ խմբի տեսություններն էլ  մատնանշում են նյարդամեդիատորների ձեւավորման դիսբալանսը՝ առաջին հերթին դա վերաբերվում է դոֆամինին եւ գլուտամատին: Նոր հետազոտությունը պնդում է, որ բոլոր երեք փոփոխություններն էլ կարող են միասնական նյարդամոլեկուլյար պատճառ ունենալ: Համապատասխան հոդվածը լույս է տեսել Nature Neuroscience

Գիտնականները մկների նյարդային բջիջներից հեռացրել են Arp2/3 սպիտակուցը: Ի զարմանս գիտնականների՝ պարզվեց, որ դրանից հետո մկները սկսում էին այնպիսի վարքագիծ դրսեւորել, որը համապատասխանում էր շիզոֆրենիայի ախտանիշներին: Ընդ որում՝ համապատասխան դեղամիջոցների ընդունումը մեղմում էր կամ վերացնում այդ ախտանիշների մեծ մասը: Բայց ամենակարեւորն այն է, որ բոլոր ախտանիշներն էլ կապված են ուղեղի անատոմիայիում եւ ֆիզիոլոգիայում պաթոլոգիկ փոփոխություններով, որոնք առկա են շիզոֆրենիայով տառապող մարդկանց մոտ:

Հետազոտողները պնդում են, որ բացահայտել են ունիվերսալ մեխանիզմ, որը թույլ է տալիս համակցել շիզոֆրենիայի՝ գոյություն ունեցող բոլոր նյարդաֆիզիոլոգիական բացատրությունները եւ ապագայում ստեղծել դրա բուժման իրապես գործող միջոց:

Հարցեր, պատասխաններ, մեկնաբանություններ