Մետաստազները կարող են առաջանալ մինչև բուն քաղցկեղի հայտնաբերումը

Կրծքագեղձի քաղցկեղի բջիջները սկսում են օրգանիզմով տարածվել շատ ավելի վաղ, քան բժիշկները կհայտնաբերեն բուն քաղցկեղը: Այսպիսի եզրակացության են եկել Նյու-Յորքի Icahn School of Medicine-ի հետազոտողները:

Ամերիկյան գիտնականները պարզել են, որ նախքան բուն ուռուցքի հայտնաբերումը կրծքագեղձի քաղցկեղի որոշ բջիջներ արդեն թափանցում են այլ օրգաններ` ստեղծելով մետաստազների առաջացման վտանգ: Այս հետազոտության արդյունքներն արմատապես փոխում են քաղցկեղի բջիջների տարածման մասին մոտեցումը` ժխտելով այն պնդումը, որ մետաստազավորումը տեղի է ունենում միայն վերջին փուլերում:

Մինչև աճ գրանցելն այլ օրգան-համակարգեր թափանցած քաղցկեղային բջիջները կարող են նիրհած վիճակում մնալ երկար տարիներ: Սակայն, քանի որ այս բջիջները սկզբնական ուռուցքից առանձնանում են չափազանց վաղ շրջանում, նրանք կարող են չարձագանքել այն բուժմանը, որին արձագանքում է բուն ուռուցքը: Արդյունքում դրանք կարող են այնպիսի ուժեղ մուտացիայի ենթարկվել, որ առաջացնեն բոլորովին այլ քաղցկեղ:

Հետազոտության արդյունքներն ընդգծում են ամենավաղ փուլում ուռուցքների ախտորոշման անժխտելի կարևորությունը: Այս ուսումնասիրությունը նաև բացատրում է, թե ինչու որոշ մարդկանց մոտ առաջանում են երկրորդային ուռուցքներ` առանց առաջնայինների հայտնաբերման: Նախկինում ընդունված էր համարել, որ օրգանիզմում մետաստազներ ի հայտ են գալիս քաղցկեղի զարգացման 4-րդ փուլում:

Հարցեր, պատասխաններ, մեկնաբանություններ