Նոր թեստ-համակարգը կթեթեւացնի ուղեղի քաղցկեղի դեմ դեղերի փնտրտուքը. news.am

Johns Hopkins Kimmel Cancer Center-ի գիտնականները նոր համակարգ են մշակել, որը կարող է օգնել գնահատելու ուղեղի քաղցկեղի հազվագյուտ տեսակների դեմ հակաուռուցքային դեղերի արդյունավետությունը: Գիտնականները հույս ունեն այդ համակարգի օգնությամբ այնպիսի դեղեր հայտնաբերել, որոնք ի վիճակի են հաղթահարել մեդուլոբլասթոման եւ քաղցկեղի այլ հազվագյուտ տեսակներ, որոնք դժվար են ենթարկվում բուժման:

Հետազոտողներին հաջողվել է ցողունային բջիջները վերածել գլխուղեղի ագրեսիվ եւ հազվագյուտ ուռուցքի` մեդուլոբլասթոմայի բջիջների, որը սովորաբար երեխաների մոտ է զարգանում: Նման մոդելն անհամեմատ ավելի հարմարավետ է, քան մկան բջիջները, որոնք հաճախ օգտագործվում են նման փորձարկումներում. դրանք օգտագործելով` հեղինակները կկարողանան գնահատել այդ ուռուցքի դեմ պայքարի համար նախատեսված դեղերի արդյունավետությունը: 

Սովորաբար մեդուլոբլասթոմայի բուժման համար ճառագայթային թերապիայի եւ քիմիաթերապեւտիկ դեղերի համադրություն են օգտագործում: Նույնիսկ նման բուժման դեպքում ապրելիությունն ընդամենը 30-40 տոկոս է կազմում:

Այն բջիջները, որ գիտնականները կարողացել են ստանալ ցողունայիններից, ունեն մեդուլոբլասթոմայի բջիջների ամբողջ բնութագիրը: Հեղինակները կարողացել են ստուգել դեղերի մեծ քանակություն եւ պարզել, որ մեդուլոբլասթոմայի հազվագյուտ տեսակի բուժման գործում առավել արդյունավետ են ցիկլինկինազի պաշարիչները: Պալբոցիկլիբը եւ այլ դեղեր, որոնք այդ խմբի մեջ են մտնում, այժմ կլինիկական փորձարկումների առաջին փուլում են. դեղերը փորձարկում են ուղեղի տարբեր ուռուցքներով երեխաների բուժման գործընթացում:

Բջիջների վրա փորձարկումներում այդ դեղերը երկու անգամ նվազեցրել են ուռուցքային բջիջների աճը եւ երեք անգամ մեծացրել քաղցկեղային բջիջների ապոպտոզի մակարդակը: Հազվագյուտ տեսակի մեդուլոբլասթոմայով մկների ապրելիությունը եւս աճել է: Գիտնականները հույս ունեն նոր մոդելի օգնությամբ նաեւ այլ դեղեր գտնել, որոնք ի վիճակի են պայքարել քաղցկեղի հավագյուտ տեսակների դեմ:

Հարցեր, պատասխաններ, մեկնաբանություններ