Գիտնականները քաղցկեղի բուժման լիովին նոր միջոց են առաջարկել. news.am

University of Texas at San Antonio-ի գիտնականներն ուռուցքների բուժման լիովին նոր մեթոդ են նկարագրել: Նրանք առաջարկում են ուռուցքի մեջ նիտրոբենզալդեհիդ մտցնել, որը ներթափանցում է քաղցկեղային բջիջների մեջ: Դրանից հետո ուռուցքի վրա ազդում են ուլտրամանուշակագույն ճառագայթով: Դա հանգեցնում է բջիջներում օքսիդացման գործընթացներին եւ հետագա մահվան:

Մեթյու Գդովինը կարծում է, որ այդ մշակման շնորհիվ հնարավոր կլինի հաղթահարել անվիրահատելի ուռուցքները եւ երեխաների քաղցկեղը:

Հետազոտության ընթացքում գիտնականները ցույց են տվել, որ իրենց առաջարկած մշակումից երկու ժամ անց ուռուցքային բջիջների 95 տոկոսը մահացել է: Հետազոտողներն այդ մոտեցումը փորձարկել են կաթնագեղձի եռակի բացասական քաղցկեղի վրա, որն առավել դժվարությամբ է ենթարկվում բուժման: Նրանց հաջողվել է կանգնեցնել քաղցկեղի այդ տեսակով տառապող մարդկանց մոտ ուռուցքի աճը, իսկ փորձարկման ենթարկված կրծողների գոյատեւման շանսերը կրկնակի մեծացել են:

Գիտնականները համարում են, որ նման մոտեցումը լիովին կիրառելի է ուռուցքների մեծ մասի նկատմամբ: Բացի այդ, ի տարբերություն քիմիաթերապիայի, այս մեթոդը կկանխարգելի կրկնումները, որովհետեւ այն ազդում է անմիջապես նորագոյացության վրա:

Մեթյու Գդովինը եւս աշխատում է ֆոտոակտիվացվող նանոմասնիկների ստեղծման վրա, որոնք նախատեսված են մետաստազներ առաջացնող քաղցկեղի դեմ պայքարի համար: Նա ենթադրում է, որ նման ոչ ինվազիվ մեթոդները թույլ կտան հաղթահարել ուռուցքները, որոնք տեղադրված են դժվար հասանելի վայրերում, օրինակ` գլխուղեղում կամ ողնաշարում:

Գիտնականների առաջարկած քաղցկեղի բուժման նոր միջոցը նկարագրված է Journal of Clinical Oncology-ում:

Հարցեր, պատասխաններ, մեկնաբանություններ