Նոր մեթոդը կօգնի արագ գնահատել քիմիաթերապիայի արդյունավետությունը. news.am

Մոտ ապագայում քիմիաթերապիա ստացող հիվանդները կկարողանան իրական ժամանակի ռեժիմում պարզել, թե արդյո՞ք քիմիաթերապիան արդյունավետ է: Բոսթոնի Brigham եւ Women’s Hospital կլինիկաների գիտնականները նոր տեխնոլոգիա են մշակում, որի օգնությամբ բուժումը սկսելուց արդեն 8 ժամ անց հնարավոր կլինի իմանալ, թե այն իրո՞ք սպանում է քաղցկեղային բջիջները:

Ներկայում քիմիաթերապիայի արդյունավետության գնահատման համար համակարգչային տոմոգրաֆիա են օգտագործում, որի օգնությամբ բժիշկները հետեւում են ուռուցքի չափերի փոփոխությանը: Սակայն չի կարելի հաճախ կատարել այդ հետազոտությունը, ու  նաև դա արդյունավետ տեղեկատվություն չի ապահովի անգամ հաճախ կրկնելուց: Ներկայում գիտնականներն առաջարկում են նանոմասնիկներ օգտագործել, որոնց ներմուծումը բուժման հենց առաջին օրը կօգնի հասկանալ, թե արդյո՞ք քիմիաթերապիան ազդում է: 

Գիտնականներն առաջարկում են նանոմասնիկներն օգտագործել քիմիաթերապեւտիկ դեղերն ուռուցքին հասցնելու համար: Եթե քաղցկեղային բջիջը մահանում է դեղի ազդեցությամբ, նանոմասնիկը սկսում է կանաչ լույս արձակել. նման լուսարձակումը  նշանակում է, որ օրգանիզմը պատասխանում է թերապիային: Լուսարձակումն առաջանում է կասպազայի ազդեցության արդյունքում` ֆերմենտի, որն արտազատում են մեռնող բջիջները: Կասպազան փոխազդում է նանոմասնիկների կազմի մեջ մտնող հաղորդիչ տարրի հետ` այդպիսով կանաչ լուսազատում առաջացնելով: 

Գիտնականներն արդեն փորձարկել են նանոմասնիկների աշխատանքը շագանակագեղձի քաղցկեղի եւ մելանոմայի բջիջների վրա: Առաջին դեպքում նրանք ուռուցքային բջիջներին պակլիտաքսել են հասցնում, իսկ երկրորդ դեպքում` հակամարմիններ, որոնք օգտագործվում են իմունաթերապիայի ընթացքում: Եթե ուռուցքները զգայուն են այդ դեղերի հանդեպ, ինտենսիվ լուսարձակում է դիտվում:

Շիլադիտիա Սենգուպտին եւ իր գործընկերները կարծում են, որ կլինիկական պրակտիկայում նոր մեթոդի ներմուծումը կօգնի խուսափել հիվանդներին ոչ արդյունավետ դեղերի նշանակումից, որոնց ընդունումը ոչ մի կերպ չի ազդում նրանց ուռուցքի վրա:

Մոտ ապագայում գիտնականները հույս ունեն իրենց մեթոդը մարդկանց վրա փորձարկել:

Նոր մեթոդի մասին հայտնում է The Proceedings Of The National Academy Of Sciences ամսագիրը:

Հարցեր, պատասխաններ, մեկնաբանություններ