Քաղցկեղային բջիջներն իրար հետ հաղորդակցվում են գաղտնի «թունելներով».

Նորվեգական համալսարանի կենսաբանների թիմը քաղցկեղային բջիջների հաղորդակցության նոր ուղիներ է հայտնաբերել: Պարզվում է, որ այդ բջիջներ միմյանց եւ առողջ բջիջների հետ «հաղորդակցվում են» գաղտնի, առայսօր անհայտ «թունելների» միջոցով:

Ինչպես հայտնում են Բերգենյան համալսարանի մասնագետները, այս բացահայտումը հնարավորություն է տալիս ո՛չ միայն հասկանալ քաղցկեղային ուռուցքների մետաստազներ առաջացնելու մեխանիզմները, այլեւ այդ թունելներն օգտագործել դեղորայք հասցնելու ու քաղցկեղը բուժելու նպատակով:

Քաղցկեղային բջիջների հաղորդակցությունը գիտնականները դիտարկել են լաբորատոր սրվակներում, սակայն նրանք վստահ են, որ նույնատիպ գործընթացներ են կատարվում նաեւ կենդանի օրգանիզմում: Այս համոզմունքի համար հիմք են կրծողների մասնակցությամբ անցկացված փորձերի արդյունքները: Ապագայում Նորվեգական համալսարանի աշխատակիցները ծրագրում են զբաղվել քաղցկեղի դեմ նոր արդյունավետ դեղերի մշակումով:

Այս հայտնագործության մասին հայտնում է The FASEB Journal ամսագրի նոյեմբերյան համարը:

«Միայն մեքսիկական նարկոբարոնները չեն գաղտնի ճանապարհներ օգտագործում նյութը՝ անանցանելի թվացող խոչընդոտներով փոխանցելու նպատակով»,- ասել է ամսագրի գլխավոր խմբագիր Հերալդ Վայսմանը,- Քաղցկեղային բջիջները նույնն են անում, միայն թե՝ բջջային մակարդակում: Հիմա, երբ մենք գիտենք այդ թունելների գոյության մասին, մենք կարող ենք գտնել դրանք փակելու կամ դեղամիջոցի փոխանցման համար օգտագործելու ձեւերը»:

Հարցեր, պատասխաններ, մեկնաբանություններ