Քաղցկեղային բջիջները կարելի է վերածրագրավորել եւ դարձնել առողջ. med.news.am

Գիտության պատմության մեջ առաջին անգամ Ֆլորիդայի Մայո կլինիկայի գիտնականներին հաջողվել է վերածրագրավորել չարորակ բջիջները ու վերածել դրանք առողջ բջիջների։ Հետազոտողները կրծքի, թոքերի ու միզապարկի չարորակ բջիջները վեր են ածել անվնաս բարորակ բջիջների․ դրա համար նրանք վերականգնել են այն գործառույթը, որը թույլ չի տալիս բջիջներին չափազանց արագ բաժանվել ու ձեւավորել վտանգավոր նորագոյացություններ։

Առայժմ տվյալ մեթոդը մարդու չարորակ բջիջների վրա փորձարկվել է միայն լաբորատոր պայմաններում, բայց հետազոտողները հույս ունեն, որ մոտ ապագայում կկարողանան այն կիրառել ուռուցք ունեցող հիվանդների վրա՝ ազատելով նրանց քաղցկեղից՝ առանց ծանր ընթացող քիմիաթերապիայի, ճառագայթման կամ վիրահատման։

Մեր օրգանիզմում բջիջները մշտապես կիսվում են և հին ու հիվանդ բջիջներին փոխարինելու են գալիս երիտասարդ եւ առողջ բջիջները։ Երբ բջիջների քանակն արդեն բավարար է դառնում, օրգանիզմը դրանց կիսումը դադարեցնելու ազդակ է ուղարկում․ այս գործընթացը կանոնակարգվում է միկրոՌՆԹ կենսաբանական միկրոգործընթացներով, որոնք արտադրում են PLEKHA7 սպիտակուցը, և որն արգելակում է բջիջների աննորմալ, անվերահսկելի բաժանումը։

Քաղցկեղի ժամանակ այդ գործըթնացը չի աշխատում, ու բջիջները սկսում են կիսվել առանց արգելակների՝ վերածվելով ուռուցքի։ Գիտնականները բջիջների արգելակները վերականգնելու համար միկրոՌՆԹ են  ներարկել քաղցկեղային ուռուցքների մեջ, ինչը հանգեցրել է PLEKHA7 սպիտակուցի մակարդակի կարգավորմանը, եւ քաղցկեղային բջիջները դադարել են անվերահսկելիորեն կիսվել։

Այս հետազոտության մասին հայտնում են Nature Cell Biology ամսագրում։

Հարցեր, պատասխաններ, մեկնաբանություններ