Բիոպսիան չի՞ նպաստում քաղցկեղային ուռուցքների տարածմանը. news.am

Քաղցկեղով հիվանդ շատ մարդիկ խուսափում են բիոպսիայից՝ վախենալով, որ այն կարող է նպաստել քաղցկեղային ուռուցքների տարածմանը: Սակայն Mayo Clinic-ի վերջերս կատարած հետազոտությունը ցույց է տվել, որ այդ վախերն ահիմն են:

Gut ամսագրում հրապարակված հետազոտությունը ցույց է տվել, որ բիոպսիա անցած հիվանդների ապրելու շանսերը նույնիսկ ավելի մեծ են եղել, քան գործընթացից հրաժարվողներինը: 11 տարվա ընթացքում գիտնականներն ուսումնասիրել են ենթաստամոքսային գեղձի (առանց մետաստազների) քաղցկեղ ունեցող 2000 հիվանդի տվյալները, եւ պարզել են, որ բիոպսիա անցնելուն համաձայնած մարդիկ ավելի արդյունավետ բուժում են ստացել, քան նրանք, ովքեր չեն ցանկացել ռիսկի դիմել: Հավանաբար, սա կապված է նրա հետ, որ բիոպսիան բժիշկներին ուռուցքի բնույթի մասին շատ տվյալներ է տրամադրում, եւ վերջիններս էլ հնարավորություն են ստանում ավելի լավ բուժման ընթացք մտածել:

Հետազոտության առաջատար հեղինակ, գաստրոէնտերոլոգ Մայքլ Վելեյսը պնդում է, որ բժշկության ոլորտում հայտնի են դեպքեր, երբ ուռուցքը տարածվել է բիոպսիայից հետո, բայց այդպիսի դեպքերը շատ հազվադեպ են, եւ դժվար թե հիվանդներին արժե անհանգստանալ դրա համար:

Հետազոտողներն ուսումնասիրել են միայն ենթաստամոքսային գեղձի քաղցկեղի դեպքերը, սակայն, նրանց կարծիքով, արդյունքները կարելի է տարածել նաեւ քաղցկեղի ուրիշ տեսակների վրա, քանի որ, անկախ ուռուցքի տեսակից, բիոպսիայի դեպքում սովորաբար բարակ ասեղ է օգտագործվում, որի միջոցով անալիզների համար հիվանդ հյուսվածքներից նմուշներ են վերցվում:

Հարցեր, պատասխաններ, մեկնաբանություններ